Qyzylordada ótken «Baıqońyr Invest» İH ınvestısıalyq forýmynda kóterilgen negizgi máselelerdiń biri — «Baıqońyr» ǵarysh keshenin damytý boldy, — dep habarlady Qamshy.kz aqparat agenttigi 

«Qazaqstan — Reseı áriptestigi aıasynda Baıqońyr qalasyn damytý» taqyrybyndaǵy seksıa jumysyna Baıqońyr keshenindegi QR Prezıdentiniń arnaıy ókili, Qyzylorda oblysy ákiminiń orynbasary Serik Qojanıazov jetekshilik etti. Onyń jumysy barysynda «Baıqońyr» kesheninde bıznesti damytý usynystary ortaǵa salyndy.

Eki eldiń ǵaryshty ıgerý salasyndaǵy  memlekettik saıasaıaty álemdegi alǵashqy ǵarysh kesheni -— «Baıqońyrdy» jańǵyrtýdy kózdeıdi. Ony damytýdyń jańa satysy 2016 jyldyń 26 jeltoqsany kúni úkimetaralyq deńgeıde bekitilgen «Baıqońyr» kesheni boıynsha odan arǵy ózara tıimdi yqpaldastyq Tujyrymdamasy. Qujat 2050 jylǵa deıin eseptelgen jáne ol 9 negizgi baǵyttan turady.

Cerik Qojanıazov atap ótkendeı, búginde keshen eki el basshylarynyń kelisimi negizinde áleýmettik-ekonomıkalyq  damýdyń jańa satysyna kóterilip otyr.

Baıqońyrda bıznesti órkendetý týraly Baıqońyr qalasy boıynsha ekonomıkalyq damý basqarmasynyń basshysy Rýslan Ámirov baıandap berdi. Búginde juldyzdy qalashyqta 76 myń adam tursa, olardyń 500-den astamy  kásipker. Qalanyń erekshe statýsyna sáıkes  kásipkerlerge jer telimin berý jaıy eki jaqty kelisim negizinde sheshiledi.

Al qala syrtyndaǵy eldimekender Qazaqstan zańy sheńberinde jumys isteıdi. Sondaı-aq QR aeroǵarysh komıtetiniń tóraǵasy Erkin Shaımaǵanbetov Qazaqstan men Reseıdiń birikken «Báıterek» jobasynyń búgingi jaıyn áńgimelep berdi. Ol  joba boıynsha alǵashqy ushyrylym 2022 jyly júzege asyrylatynyn jetkizdi.

Seksıa jumysyn qorytyndylaǵan Serik Qojanıazov qalanyń damýy úshin arnaıy baǵdarlama jasalǵanyn, sonyń negizinde aldaǵy ýaqytta kásipkerler keshenge kerekti kásiporyndar ashyp jumys jasaıtynyn aıtyp ótti. Munan ózge turǵyn úı, áleýmettik nysandar boı kóterip, qala jańasha damýǵa bet buratyn bolady. Búgingi kúni gaz jelisi «Baıqońyr» qalasyna qosylyp úlgerse, kelesi jyldan bastap munda sý jeleleri jańartylmaq.