Til festıvali aıasynda Astana qalasynda Túrki álemi jastarynyń qatysýymen halyqaralyq "Jaıdarman" oıyny ótti.

 «Qazaqstan KVN Odaǵy» respýblıkalyq qoǵamdyq birlestigi uıymdastyrǵan «Jaıdarmanǵa» qazaq oıynshylarynan bólek, alǵash ret baýyrlas Bashqurtstan, Qyrǵyzstan, Tatarstannan kelgen komandalarmen birge ózbek jáne uıǵyr jastarynyń quramalary qatysty.

 Bul oıyn kórermenge qýanysh syılaǵan sapaly ázilderimen ǵana emes, biryńǵaı qazaq tilinde ótkenimen de erekshelendi. Sonymen birge, túrki halyqtarynyń ázili de ortaq ekenin kórsetti.

 Qyzyqty oıyn nátıjesinde bas júlde 10 komanda arasynan sýyrylyp shyqqan qyrǵyzstandyq «Pozıtıv» tobyna buıyrdy. Júldeli birinshi oryndy Tatarstan quramasy jeńip alsa, ekinshi oryndy Bashqurtstan quramasy ıelendi. Al, Ońtústik Qazaqstan oblysy men Qostanaı komandalary úshinshi oryndy bólisti.

 Oıynǵa qazylyq etken Túrki akademıasy halyqaralyq uıymynyń (TWESCO) basshysy Darhan Qydyráli ádemi ázilderimen kórermen yqylasyna bólenip, jaqsy oıyn órnegin kórsetken uıǵyr jastarynyń «Lagman.com» komandasy men ózbek jastarynyń «Iassy» quramasyna Akademıa atynan 250 myń teńgelik sertıfıkattardy tabystady.