Senat depýtaty Álı Bektaev Úkimet basshysyna depýtattyq saýal joldap, ajyrasý úshin tólenetin baj salyǵyn kóbeıtýdi usyndy, dep jazady Qamshy.kz

Depýtattyń dereginshe,  sońǵy bes jylda   ajyrasýlardyń sany 4 myńǵa kóbeıgen. Onyń 40 paıyzy  qalalyq otbasy.

Otbasy qundylyǵyn jandandyrý máselesin kótergen depýtat qyz-kelinshekterdi túrmege japqannan góri, olarǵa keshirimmen qaraý kerek degen usynys aıtty. Qazir elimizdegi 6 kolonıada 2 161 áıelzaty jazasyn ótep jatyr eken.

«Áıel ózdiginen qylmys jasamaıdy. Eger zań buzýshylyqqa barsa, onyń astaryn áleýmettik problemadan izdeý kerek. Qyz-kelinshekterdi túrmege japqannan góri keshirim jasap, olarǵa kómek kórsetken abzal. Túrmege túsken qyz balasy túgili, erlerdiń arasynan sana-sezimi psıhologıalyq deformasıaǵa ushyramaǵan jandy kezdestirýdiń ózi qıyn. Qoǵamda qyzǵa, áıelge, anaǵa, balaly otbasylarǵa degen kózqarasty múldem qaıta qaraýdyń ýaqyty keldi», — dedi senator.

Statısıkaǵa súıensek, 2016 jyly Qazaqstanda 140 840 neke tirkelgen. Degenmen osy bir jyl ishinde 51 775 otbasy ajyrasyp ketken. Onyń ishinde Batys Qazaqstan oblysynda 5 030 jup úılense 1829-y ajyrasqan.

Túrli statısıkany sóıletken Álı Bektaev Premer-mınıstrge birqatar usynys aıtty. Otbasy qundylyqtaryn jan-jaqty zertteý  maqsatynda QR Bilim jáne ǵylym mınıstrligi janynan arnaıy Neke jáne otbasy ǵylymı-zertteý ınstıtýtyn ashý kerektigin alǵa tartty. Sondaı-aq,  Otbasynyń buzylýyn tejeý maqsatynda neke buzýǵa tólenetin baj salyǵynyń kólemin juptarǵa materıaldyq turǵydan seziletindeı etip kóbeıtýdi usyndy.