Baqytty da tatý  otbasy – qoǵamnyń baılyǵy.  Osy oraıda «Nur Otan» partıasy Batys Qazaqstan oblystyq fılıalynyń ókilderi «Baqytty otbasy – baqytty balalyq shaq» jobasy aıasynda áleýmettik qoldaýdy qajetsinetin otbasynda tárbıelenip jatqan balalarǵa áleýmettik kómek kórsetti.

Bıyl Batys Qazaqstan oblysy boıynsha  atalmysh joba aıasynda kirisi az otbasynda tárbıelenip jatqan balalardyń jaǵdaıyn bilý maqsatynda arnaıy reıd uıymdastyrylyp, monıtorıń jumystary júrgizilgen edi. Reıd barysynda Oral qalasynyń  otyz bir jasar Natalá Kojevnıkova tórt perzentiniń kıim-keshekten qınalyp júrgenin jetkizgen edi.Bul joly oblystyq máslıhattyń depýtaty Lána Tursynova tórt balaǵa qajetti kúrtesheler, aıaq kıimder syılady. Sondaı-aq jumyssyz qalǵan Nataláǵa jumys usynyp,  Oral qalalyq №26 jalpy bilim beretin orta mektebinde oqıtyn eki balasyn tegin tamaqpen qamtamasyz etetinin aıtty. Bir sátte kól-kósir qýanyshtyń ıesi bolǵan jas ana sheksiz alǵysyn bildirdi.  Halyq qalaılylarynyń mańdaı tiregen kelesi áskerı qyzmetkerlerdiń januıasynda jeti perzent ósip keledi. Aq dastarhanyn jaıyp, qarsy alǵan kóp balaly ana Mádına Aqylbaeva búgingi kúnine shúkirshilik aıtady.

• Jubaıym – áskerı qyzmetker. Ózim de osy áskerı salada qyzmet jasadym. Ázirge bala kútimimen úıde otyrmyn. Qyzmet babymen Aqtaý qalasynan kóship keldik. Jeti balamnyń úlkeni on  beste, kishisi úsh jasta. Qazaqta «Baı bolyp kórgen joqpyn, kedeı bolyp ólgen joqpyn» degen jaqsy támsil bar. Sol aıtqandaı, bireýden ilgeri, bireýden keıin ómir súrýdemiz. Balaly úı qashan da bazarly. Balalarymnyń deni saý bolyp, aýyrmaı ósip ketse, sonyń ózi bizge úlken demeý. Búgin bizdiń jaǵdaıymyzdy bilip, hál suraı kelgen jandarǵa alǵysym zor,- deıdi kóp balaly ana. Reıd barysynda  bul otbasynyń perzentteri de kıim-keshekpen qamtamasyz etildi.

Qazaqta «Qýantsań balany qýant» degen sóz bar. Qamkóńil balalardyń qýanyshyna ne jetsin?! Mundaı baǵyttaǵy saýaby tıer sharapatty is  Aq Jaıyq óńirinde  jalǵasa bermek.

Gúlim Aqap,

Batys Qazaqstan oblysy