İs-sharaǵa Parlament depýtattary, memlekettik organdar men úkimettik emes uıymdardyń ókilderi jáne qalyń jurtshylyq qatysty.

Gúlshara Ábdiqalyqova quttyqtaý sózinde Memleket basshysy «Azamattyq qoǵam, sonyń ishinde úkimettik emes uıymdar – demokratıanyń ajyramas bóligi» dep atap ótkenin aıtty.

Áleýmettik ortanyń belsendiligin arttyrmaıynsha qoǵamdyq sanany jańǵyrtý múmkin emes. Úkimettik emes sektordy nyǵaıtý osy úderistiń ajyramas bóligi bolyp sanalady.

Táýelsizdik jyldarynda qazaqstandyq ÚEU jaqsy tájirıbe jınaqtady. Búginde elimizde 19 680 ÚEU tirkelgen. Olar kóbine Astana men Almaty qalalarynda, Ońtústik Qazaqstan, Qaraǵandy jáne Qyzylorda oblystarynda belsendi jumys júrgizýde. Úkimettik emes uıymdarda 29 myńnan astam adam jumyspen qamtylǵan. Memlekettik áleýmettik tapsyrys pen memlekettik granttar bar. Memlekettik áleýmettik tapsyrys aıasynda sońǵy 2 jylda ÚEU quny 23 mıllıard teńgeden asatyn 4 myńnan astam áleýmettik jobany iske asyrdy. 2016 jyldan bastap jobalardy memlekettik grant arqyly qarjylandyrý ádisi engizildi. Osy ýaqyt ishinde jalpy quny 800 mıllıon teńgeden asatyn 70-ke jýyq joba iske asyryldy.

Úkimettik emes uıymdarǵa arnalǵan syılyqtar respýblıkalyq, salalyq jáne óńirlik deńgeıdegi áleýmettik máselelerdi sheshýge atsalysqany úshin 15 nomınasıa boıynsha beriledi. Ár nomınasıadaǵy syılyqtyń mólsheri – 4,5 mıllıon teńge.

Barlyǵy 230 ótinim kelip tústi. Eń kóp ótinim myna baǵyttar boıynsha tirkeldi: halyqtyń áleýmettik turǵydan osal toptaryn qoldaý – 53 ótinim nemese 23 paıyz, jastar saıasaty men balalar bastamasyn qoldaý – 28 ótinim nemese 12,2 paıyz, azamattar men uıymdardyń quqyqtaryn, zańdy múddelerin qorǵaý – 18 ótinim nemese 7,8 paıyz, qoǵamdyq kelisim men jalpyulttyq birlikti nyǵaıtý – 18 ótinim nemese 7,8 paıyz.

58 úkimettik emes uıym syılyq ıegeri atandy. Olardyń arasynda – «Ardager» qoǵamdyq birlestigi, «Qazaqstan Respýblıkasy Prezıdentiniń «Bolashaq» Halyqaralyq stıpendıasy stıpendıattary qaýymdastyǵy» qoǵamdyq birlestigi, «Jenskıı lých» qoǵamdyq birlestigi, «Pravo» qoǵamdyq qory, «Enactus Kazakhstan» jekemenshik qory jáne basqa uıymdar bar.

İs-shara aıasynda elimizdiń belgili ónerpazdarynyń qatysýymen konsert ótti.