Qazaqstan Respýblıkasynyń Ulttyq Banki 2017 jylǵy 22 qarashadan bastap, 2017 jylǵy úlgidegi dızaıny ózgertilgen nomınaldyq quny 500 teńgelik banknottardy aınalysqa shyǵarady dep habarlaıdy Qamshy.kz aqparat agenttigi.
Banknottyń dızaıny aınalystaǵy «Qazaq Eli» serıasynyń aqsha belgilerimen biryńǵaı stılde – bet jaǵynda basym túrde tiginen beıneler, al syrt jaǵynda kóldeneń túrinde beıneler oryndalǵan. Basym túsi – kógildir-kók. Banknottyń ólshemi – 130h62 mm.
Jańa banknottardyń dızaınyn ázirleýdiń jáne daıyndaýdyń asa uzaq proses ekendigin atap ótemiz. Osyǵan baılanysty 2017 jylǵy úlgidegi nomınaldyq quny 500 (bes júz) teńgelik banknottardaǵy memlekettik tildegi jazýlar banknottyń dızaınyn ázirleý sátinde qoldanystaǵy, kırıllısaǵa negizdelgen álipbıge sáıkes oryndalǵan.
Ulttyq valúta – teńge banknottary men monetalaryndaǵy jazýlardy ózgertý jumysyn Ulttyq Bank «Qazaq tili álipbıin kırıllısadan latyn grafıkasyna kóshirý týraly» Qazaqstan Respýblıkasy Prezıdenti N. Á. Nazarbaevtyń 2017 jylǵy 26 qazandaǵy № 569 Jarlyǵyna sáıkes júrgizetin bolady.
Banknottyń bet jaǵy
Negizgi beıneler – banknottyń oń jaǵyndaǵy «Qazaq Eli» monýmenti jáne ortasynda tómengi bólikte ushyp bara jatqan kógershinder. Joǵary bóliginde ortasynda jáne sol jaǵynan Qazaqstan Respýblıkasynyń memlekettik rámizderi: memlekettik eltańba jáne memlekettik tý beınelengen. Sol jaqta tómende jáne joǵary jaqta nomınaldyń sıfrlyq beınelenýi, sol jaqta ortasynda nomınaldyń memlekettik tildegi áriptik beınelenýi ornalasqan. Joǵary sol jaq buryshynda «QAZAQSTAN ULTTYQ BANKİ» degen jazba, onyń astynda qoldan jasaǵany úshin jaýapkershilik týraly eskertetin «Banknottardy qoldan jasaý zańmen qýdalanady» degen memlekettik tildegi jazba ornalasqan. Banknottyń syrt jaǵy Negizgi beınesi – Kaspıı teńizi, onyń artynda – Qazaqstan kartasynyń beınesi. Sol jaǵynda tómende jáne oń jaǵynda joǵaryda banknot nomınalynyń sıfrlyq beınelenýi, al tómende ortasynda – orys tilindegi áriptik beınelenýi ornalasqan. «Poddelka banknot presledýetsá po zakoný» degen jazba banknottyń sol jaq buryshynda ornalasqan.
2006 jylǵy úlgidegi jáne 2017 jylǵy úlgidegi nomınaly 500 teńgelik banknottardyń qatar qoldanylý kezeńi 2017 jylǵy 22 qarasha – 2020 jylǵy 10 maýsym bolyp belgilendi jáne «2006 jylǵy úlgidegi jáne 2017 jylǵy úlgidegi nomınaly 500 teńgelik banknottardyń qatar aınalysta bolý kezeńin belgileý týraly» Qazaqstan Respýblıkasy Ulttyq Banki Basqarmasynyń 2017 jylǵy 2 qarashadaǵy № 207 qaýlysyna sáıkes júzege asyrylady.
2006 jylǵy úlgidegi jáne 2017 jylǵy úlgidegi nomınaly 500 teńgelik banknottar qatar aınalysta bolý kezeńinde Qazaqstan Respýblıkasynyń búkil aýmaǵynda zańdy tólem quraly bolyp tabylady jáne tólemder men aqsha aýdarymdarynyń barlyq túrleri boıynsha qabyldanýǵa mindetti.
Qazaqstan Respýblıkasynyń Ulttyq Banki zańdy tólem quraly bolyp tabylatyn banknottar men monetalardy qabyldaýdan bas tartý, Ákimshilik quqyq buzýshylyqtar týraly Qazaqstan Respýblıkasynyń kodeksine sáıkes ákimshilik quqyq buzýshylyq bolyp tabylatynyn eske salady.
