21-24 qarasha aralyǵynda Los-Andjeleste (AQSH) Qazaqstan kınosynyń kúnderi ótýde. Saban teatrynda «Spirit of the Great Steppe» - «Uly dala rýhy» atty uly mádenı is-sharanyń resmı bóligi ótti. Bul is-sharany Qazaqstan Respýblıkasynyń Mádenıet jáne sport mınıstrligi AQSH-tyń Qazaqstandaǵy Elshiliginiń qoldaýymen «Rýhanı jańǵyrý» baǵdarlamasy aıasynda uıymdastyrdy, dep habarlaıdy Qamshy.kz aqparat agenttigi QR Mádenıet jáne sport mınıstrligine silteme jasap.
Amerıkalyq aýdıtorıaǵa «Qyz Jibek», «Almas qylysh», «Anaǵa aparar jol» jáne «Oskar» syılyǵyna usynylǵan, QR Tuńǵysh Prezıdenti N.Á.Nazarbaevtyń balalyq shaǵy týraly baıandalǵan «Balalyq shaǵymnyń aspany» fılmi usynyldy.
Qazaqstan delegasıasyn Mádenıet jáne sport mınıstri Arystanbek Muhamedıuly basqardy. Ashylý saltanatynda vedomstvo basshysy AQSH-taǵy Qazaqstan Respýblıkasynyń Mádenıet jáne kıno kúnderin ótkizý amerıkandyqtardyń qazaq mádenıetine degen qyzyǵýshylyǵyn týdyryp, qazaq-amerıkalyq mádenı baılanystardyń damýyndaǵy jańa kezeńge aınalatynyn atap ótti.
«Bul is-shara eki el arasyndaǵy mádenı qarym-qatynas tarıhynda qalatyny sózsiz! «Spirit of the Great Steppe» – «Uly Dala Rýhy» atty sharamyzdyń kózdegen maqsaty – amerıkalyq kórermenderdi Qazaqstannyń baı ulttyq – mádenı murasymen tanystyrý bolyp tabylady», – dep atap ótti Arystanbek Muhamedıuly.
Atalǵan sharaǵa Qazaqstannyń AQSH-taǵy elshisi – Erjan Qazyhanov, belgili mádenıet jáne qoǵam qaıratkerleri, KSRO jáne Qazaqstan Halyq ártisi Asanáli Áshimov, QR Halyq ártisi Quman Tastanbekov, QR Eńbek sińirgen qaıratkeri Merýert Ótekeshova, QR Halyq ártisi Aıman Musahodjaeva, rejıser Rústem Ábdirashov, aktrısa Altynaı Nógerbek, Madına Esmanova jáne Sh. Aımanov atyndaǵy «Qazaqfılm» kınostýdıasynyń ókilderi qatysty.
Asanáli Áshimov eki eldiń mádenı qarym-qatynastaryna arnalǵan is-sharanyń mańyzdylyǵyn atap ótti.
«Biz uzaq jol arqyly Los-Andjeleske ushyp keldik. Bizdiń «Qyz Jibek» týyndymyz óte jyly qabyldanyp otyr. Fılm kórermender arasynda úlken qyzyǵýshylyq týdyrǵanyna qýanyshtymyn, - dedi KSRO men Qazaqstannyń Halyq ártisi.
Sheteldik kınorejısserler qazaqstandyq kınematograftyń damýyna joǵary baǵa bere otyryp, otandyq kınofılmderge qatysty pikirlerin bildirdi. Spirit of the Great Steppe «qyzyl kileminde» Djon Malkovıch pen «Gladıator» fılminiń avtory Devıd Franzonı júrip ótti. Oskar syılyǵynyń ıegeri, Qazaqstanda ótken Eýrazıa kınofestıvalinde qazylar alqasynyń múshesi bolǵanyn atap ótti.
«Men de qazaqstandyq kınomen tanyspyn. Eń aldymen ondaǵy akterlerdiń talant deńgeıine tańyrqadym. Qazaqstandyq kıno ártúrli – qarapaıymnan óte kúrdelige deıin. Fılm neǵurlym qarapaıym bolsa, soǵurlym jaqsy. Sizderdiń kınolaryńyz komersıalyq máseleden alshaqtaý, mine bizge de osy jaǵynan sizderden úırenerimiz kóp», - dedi Franzonı.
Qazaq kınorejısserlerdiń jumysy amerıkalyqtardy tańqaldyrmaı qoımady. Zaldaǵy kórermen kınonyń sońyna deıin erekshe ásermen otyrdy.
«Maǵan «Anaǵa aparar jol» fılmindegi akterlerdiń oıyndary unady. Óte myqty akterlik quram. Sújet óte qyzyqty, ol qıyndyqtarǵa qaramastan, siz ózińizdi súıe alatynyńyzdy kórsetedi. Budan basqa, men Qazaqstan týraly fılm arqyly kóp nárse bildim», - deıdi Los-Andjeles turǵyny Braıan Mastrofını Aqan Sataevtyń fılmin kórgennen keıin.
Fılmniń kórsetiliminen keıin QR Halyq ártisi Aıman Musahodjaevanyń, Halyqaralyq konkýrstardyń laýreaty Edil Qusaıynovtyń, QazUÓÝ-niń eýrazıalyq sımfonıalyq orkestriniń jáne dúnıe júzine tanymal Dımash Qudaıbergenniń qatysýymen úlken konsert ótip, amerıkandyq tyńdarmandardyń zor yqylasyna bólendi.
