22 qarashada qazaqstandyq ánshi Sıvı Mahmudı «Eńbek Dańqy» ordenin alǵanyn óziniń Instagram jelisindegi paraqshasynda málimdedi. Alaıda jeli qoldanýshylary ánshiniń qandaı eńbegi úshin marapattalǵanyn bilmeı dal boldy, narazylyq bildirdi. Osyǵan oraı Sıvı Mahmudıdiń ne sebepti «Eńbek Dańqy» ordenin alǵanyn ánshiniń PR-menedjeri Gúldana Imanbaı Today.kz tilshisine túsindirdi, dep habarlaıdy Qamshy.kz aqparat agenttigi.

«Bul marapatty QR Mádenıet jáne sport mınıstrligi bergen joq, sony túsinseńizder deımin. Jap-jas bolyp «Eńbek Dańqy» marapatyn aldy dep halyq dúr silkindi. Aıta keteıin, marapatty Sıvıge mádenıet, sport jáne aqparat qyzmetkerleriniń salalyq kásipodaǵy tabystady. Biz ózimiz de kútpedik, bilmedik. Marapat Sıvı Mahmudıdiń 10 jyldyq eńbegi úshin berildi. Bul marapat jyl saıyn jastarǵa berilip otyrady», - dedi Gúldana Imanbaı.

Sondaı-aq 2017 jyly ánshiniń nemen aınalysqanyn aıtyp berdi.

«Bosanǵan soń Sıvı mýzykant Aıdar Rysbekpen jumys istedi, ony shetelge baıqaýǵa jiberdi. «Salamat» tobyn qurdy, jyldyq konsert ótkizdi», - dedi PR-menedjer.

Aıta keteıik, «Elektrondyq úkimet» portalynyń aqparatyna sáıkes, «Eńbek Dańqy» I, II, III dárejeli marapaty metalýrgıa ónerkásibinde uzaq ýaqyt eńbek etken azamattarǵa beriledi.