24 qarashada Alash Ordanyń 100 jyldyǵyna oraı «Ugai production» prodúserlik ortalyǵy men Qamshy.kz aqparat agenttigi uıymdastyrǵan «Jylamasyn sábıler» atty qaıyrymdylyq konserti ótti.
Aıta ketetin bolsaq, osyǵan deıin Qamshy.kz aqparat agenttiginiń uıymdastyrýymen Alash Ordanyń 100 jyldyǵyna baılanysty as berilip, 100 aǵash otyrǵyzylǵan bolatyn. Qamshy.kz aqparat agenttigi osy joly ıgi isti «Jylamasyn sábıler» atty qaıyrymdylyq sharasymen jalǵastyryp otyr.
Qaıyrymdylyq arqyly bar qazaqtyń jetimin qýantyp, muqtajyn túgendemesek te 100 jetim bala men 100 muqtaj stýdentke kómek kórsetiletin bolady. Konsert bıletiniń satylymynan jınalǵan qarajat túgelimen qaıyrymdylyqqa jumsalady. Atalǵan keshte «Ugai production» prodúserlik ortalyǵynyń jetekshisi Ushqyn Jamalbek pen atalǵan ortalyqtyń ánshileri Áset Esjan jáne Oljas Abaı óner kórsetti. Sonymen birge konsertke «Alashuly» toby men Dana Kentaı qonaqqa kelip, qaıyrymdylyq keshke óz úlesterin qosty.
Ushqyn Jamalbektiń «Anajan» ánin estigen kórermender kózderine jas alsa, Áset Esjan men Oljas Abaıdyń «Dúr qamshy» áni, «Alashuly» tobynyń «Paı-paı» áni kórermenderdi jigerlendirip, rýh syılady. Qaıyrymdylyq kesh shymyldyǵy «Men seni súıemin Qazaqstan» ánimen jabyldy.
Ushqyn Jamalbek «Jylamasyn sábıler» atty kesh «Ugai prodution» prodúserlik ortalyǵynyń uıymdastyryp otyrǵan alǵashqy konserti bolyp sanalatynyn jáne de alǵashqy qadamyn osyndaı ıgi ispen bastaǵanyna qýanyshty ekenin jetkizdi.
«Almaty ákimdiginiń qoldaýymen Qamshy.kz aqparat agenttigi men «Ugai production» prodúserlik ortalyǵynyń uıymdastyrýymen ótip jatyr. Keshten jınalǵan qarajat 100 jetim bala men 100 muqtaj stýdentke beriletin bolady», — deıdi atalǵan ortalyqtyń jetekshisi Ushqyn Jamalbek.
Osy is sharanyń basy qasynda júrgen, Qamshy.kz aqparat agenttiginiń jetekshisi Bilál Qýanysh konsertte jetim bala men muqtaj stýdenttiń ókiline sertıfıkat tabys etti.
«Álemdegi bar qazaqtyń Otany – Táýelsiz Qazaqstan. Búgingi beıbit elimiz kókten túsken joq. Alash arystarynyń qanymen, janymen, tánimen kelgen. Biz Alash dep sóıleımiz, Alash dep án aıtamyz, Alash dep jyr jazamyz. Bári durys, degenmen bir naqty is bolsa da jasaıyq degen nıetpen búgingi isimiz 100 jetim bala men 100 muqtaj stýdenttiń júregine úmit uıalatyp, Alash arystarynyń rýhynan tálim alyp jatsa, bizdiń armanymyzdyń oryndalǵany. Osy iske at salysyp otyrǵan barlyqtaryńyzǵa tek qana rahmet aıtamyz. Bir aıta keterligi, Qamshy aqparat agenttigi qurylǵaly beri 5 jylda jasalǵan sharalardyń eshqaısysyna biz memleket tarapynan bir tıyn qarajat alǵan joqpyz. Ony tek ózderińiz sıaqty arda azamattardyń kómegimen jasap otyrmyz. Endeshe máńgilik elimiz bolýy úshin barlyǵymyz judyryqtaı jumylyp Táýelsiz Qazaqstan úshin qyzmet ete bereıik», — dedi Bilál Qýanysh.
Sonymen birge Jylamasyn sábıler atty qaıyrymdylyq sharasyna Almaty ákimdigi de qoldaý bildirdi. Eli men jeriniń, ultynyń qamyn kúıttegen azamattar barda qazaqtyń týy jerge qulamaıdy, jetimi jylamaıdy.
