Shyǵys Qazaqstan oblysy — bizdiń elimizdiń eń kórikti aımaqtarynyń biri. Ol sulý tabıǵatynyń ártúrli bolýymen tanymal.

Borıs Sherbakov — bizdiń óńirimizdiń naǵyz patrıoty. Ol Batys Altaıdaǵy erekshe qorǵalatyn aýmaqtardy mekendeıtin qustardy zerttegen ornıtolog. Shyǵys Qazaqstan oblysyndaǵy janýarlardyń alýan túrliligin saqtaý úshin túbegeıli kúres júrgizgen qoǵam qaıratkeri. Sonymen qatar, daryndy jazýshy, natýralıs jáne ólketanýshy. Týǵan jeri týraly 30-ǵa jýyq kitap jazǵan.

2011 jyly Borıs Vasılevıch «Shyǵys Qazaqstan – Eýrazıanyń júregi» atty kitabynyń tusaýyn kesti. Ólke tarıhyna zor úles qosqan baǵaly kitap kásipker Vladımır Ponávınniń qoldaýymen «Lıbrıýs» baspasynda daıyndalyp, shyǵaryldy.

Óz qunyn aıqyndaǵan kitap Elbasymyzdyń nazarynan tys qalmady. Týǵan ólke jaıly jazylǵan kitaptan erekshe áser alǵan Nursultan Ábishuly basylymnyń avtory men demeýshisine jyly lebizin bildirip hat jazdy. Ol bizdiń elimizdiń tumsa tabıǵatyn qaǵaz betine túsirgen daryndy tulǵaǵa jáne demeýshisine kitapqa sińirgen eńbekteri úshin alǵys bildirdi. Elbasymyz taýlarǵa erekshe qumartatynyn jáne olardyń sulýlyǵyna tamsana qaraıtynyn  ashyq jetkizdi.

«Men taý bókterinde týylyp, sonda er jettim. Sondyqtan, kerbez taýlar árqashan meni ózine baýrap turady.  Eger mundaı tarıhı shejire Otanymyzdyń ár óńirinde jazylsa, urpaqtarymyzǵa jerimiz ben onyń tarıhy, mádenıeti týraly baǵa jetpes mura qaldyratyn edik. Barlyǵy ózgerse de, kitapqa túsken dúnıe saqtalyp qalady», – dep jazdy Nursultan Nazarbaev.