Bir kezderi Óskemen hokeı mektebiniń dańqy búkil Keńes Odaǵyna taraǵan edi. 1989 jyly sport mektebi KSRO-da eń úzdik dep tanyldy. Táýelsizdiktiń alǵashqy jyldarynda Qazaqstan ulttyq quramasynyń 99%-yn óskemendik «Torpedo» oıynshylary quraǵany tarıh betterinen belgili.
Ókinishke oraı, daǵdarys beleń alǵan jyldar elimizdegi sporttyń damýyna keri áserin tıgizbeı qoımady. Jas sportshylardy daıyndaýda dástúrge aınalǵan ádis-tásilderdi qaıta jańǵyrtýǵa týra keldi.
Ár úıdiń aýlasynda ornalasqan hokeı qoraptarynyń arqasynda, bul sport túri halyq arasynda keńinen taraı bastady. Qalamyzdyń árbir búldirshininde kónkı, taıaq jáne shaıba boldy. XXI ǵasyrda oblys basshylary aýlalardan balalarǵa arnalǵan hokeı qoraptaryn qaıtadan asha bastady.
2012 jyly Nursultan Nazarbaev Shyǵys Qazaqstanǵa jumys sapary barysynda jas sportshylarǵa jasandy muzdan jasalǵan jabyq hokeı modýlin ashty. Bul modýl «Qazaqmys» JSHS-niń qarajaty esebinen salynǵan bolatyn.
Mundaı tarıhı kúni muzǵa syrǵanaýǵa kelgen jas ulandar Elbasynan qoltańbasy bar shaıba syılyqqa alǵan edi. Al, №10 mektep-gımnazıasynyń besinshi synyp oqýshysy Rýslan Saǵymbaevtyń basqa jasóspirimderge qaraǵanda juldyzy erekshe boldy. Nursultan Ábishuly oǵan hokeı taıaǵyn syıǵa tartty.
2013 jyly «Qazaqmys» JSHS mektep oqýshylaryna taǵy bir modýl tartý etip, qýanyshty eseleı tústi. Osynyń arqasynda 3 myńǵa tarta bala súıikti sport túrimen aınalysý múmkindigine ıe boldy.
