«Nur Otan» partıasynyń Shardara aýdandyq fılıaly «Qyzyljar» bastaýysh partıa uıymy Prezıdent N.Nazarbaevtyń «Qazaqstannyń úshinshi jańǵyrýy: Jahandyq básekege qabilettilik» atty Joldaýynyń negizgi tujyrymdaryn júzege asyrý qorytyndylaryn talqylaý maqsatynda jıyn ótkizdi.

«Nur Otan» partıasy Shardara aýdandyq fılıaly tóraǵasynyń birinshi orynbasary Myrzabaı Nurmanov Joldaýdan týyndaıtyn tujyrymdardyń oryndalý barysy týraly baıandama jasap, ondaǵy mindetterdi talqylady. «Búgingi basqosýymyz el tarıhynda erekshe oryn alatyn aıtýly oqıǵalarǵa baılanysty ótip otyr. Prezıdent Joldaýy elimizdi damytýdyń úshinshi kezeńine arnalǵan. Ol 2012 jyly qabyldanǵan «Qazaqstan – 2050» strategıasynan bastaý alyp, Ult jospary «100 naqty qadam» bazasynda ótkiziledi jáne 2050 jylǵa deıingi kezeńdi qamtıdy. Elbasy óz Joldaýynda osy baǵytta damýdyń 5 negizgi basymdyqtaryn anyqtap berdi» dedi M.Nurmanov.
Bastaýysh partıa uıymynyń múshesi, M.Gorkıı atyndaǵy jalpy orta mektep dırektorynyń mindetin atqarýshy Sáýle Qadyrova Elbasynyń jyl saıynǵy halyqqa arnaǵan Joldaýyn ujym bolyp talqylaıtynyn sóz etti.
– Bala janynyń baǵbany – ustaz bolǵandyqtan, Joldaýdyń bilim salasyna qatysty tusyna toqtalyp óteıin. Joldaýdyń tórtinshi basymdyǵyndaǵy adamı kapıtal sapasyn jaqsartý jónindegi tapsyrmasy kóńilimizden shyqty. Joldaýdaǵy basymdyqtar órkenıettiń kóshinen qalmaý úshin bilimdi, ultjandy urpaqty tárbıelep, qala men aýyl mek­tepteri arasyndaǵy bilim berý sapasynyń alshaqtyǵyn joıýdy maqsat etedi, – dedi ol.
«Qyzyljar» bastaýysh partıa uıymy­nyń tóraǵasy Qasymhan Myrzabaevtyń aıtýynsha, quramynda 766 múshesi bar uıymnyń qurylǵanyna kóp ýaqyt bolmasa da óz qyzmetin joǵary deńgeıde atqaryp keledi. Sondaı-aq Joldaýda kórsetilgen 5 baǵyt boıynsha arnaıy baǵdarlamalar ázirlenip, júzege asyrylýda. Máselen, bıylǵy jyldyń ózinde aýdanda jańadan
2 balyq óńdeý zaýyty ashylǵan.

E.MURATBEK,
Ońtústik Qazaqstan oblysy