«Nur Otan» partıasy Tóraǵasynyń Birinshi orynbasary Muhtar Qul-Muhammed elimizdiń daryndy jastaryna partıalyq bıletterin tapsyrý saltanatynda osylaı dedi.
Qazaqstan Respýblıkasynyń Tuńǵysh Prezıdenti kúnine oraı uıymdastyrylǵan qabyldaý rásiminde ár salada jarqyn jeńisterge jetip júrgen el jastary «Nur Otan» partıasynyń múshesi atandy. Olardyń ishinen belgili ánshiler: Tóreǵalı Tóreáli men Erke Esmahandy, aýyr atletıkadan Rıo Olımpıadasynyń qola júldegeri Karına Gorıchevany jáne kásipqoı boksta el namysyn abyroımen qorǵap júrgen Janat Jaqıanovty erekshe atap ótken jón.
Muhtar Qul-Muhammed Elbasymyzdyń jastarǵa únemi qoldaý kórsetip, olardyń sapaly bilim alýyna jáne básekege qabiletti maman bolyp qalyptasýyna barlyq jaǵdaıdy jasaǵanyna nazar aýdardy. Táýelsiz Qazaqstannyń shırek ǵasyrda jetken jetistikteri men búkil álem tańdaı qaqqan tabystary Tuńǵysh Prezıdentimizdiń ereń eńbeginiń nátıjesi ekenin aıtqan partıa Tóraǵasynyń Birinshi orynbasary: «Elbasy salǵan dańǵyl joldan jańylmaı jahan kóshiniń aldynan kóriný endi el jastarynyń, ıaǵnı sizderdiń abyroıly mindetterińiz bolýy kerek», – dedi.
Sonymen qatar ótkenge salaýat aıtyp, tarıhtan taǵylym alý qashanda ıgi is ekenin aıtqan Muhtar Qul-Muhammed osydan bir ǵasyr buryn eldiktiń irgesin qalaǵan Alash arystarynyń eńbegine de nazar aýdardy.
– Jıyrmasynshy ǵasyr basynda patshalyq Reseıdi mekendegen túrki halyqtary ishinde qazaq ultynyń ókilderi bilimdarlyq, qaıratkerlik qabiletterimen aıryqsha kózge tústi. Alashorda úkimetiniń tóraǵasy bolǵan Álıhan Bókeıhan Máskeý men Peterbordaǵy orys oqymystylary men demokratıalyq baǵyttaǵy qaıratkerler arasynda erekshe bedelge ıe boldy. Ortalyq Azıa tarıhynda jarıalanǵan tuńǵysh demokratıalyq memlekettik qurylym – Túrkistan avtonomıasyn da Muhamedjan Tynyshpaev pen Mustafa Shoqaı sıaqty Alash arystary kezektese basqardy. Tipti bul avtonomıa kúshpen taratylyp, onyń ornyna dúnıege kelgen Túrkistan Keńestik Respýblıkasynyń basshylyǵynda da Turar Rysqulov pen Názir Tórequlov sıaqty qazaq qaıratkerleri boldy. Úrkerdeı jarqyraǵan dál osyndaı talanttar shoǵyryn sol kezdegi Orta Azıanyń birde bir ulty shyǵara alǵan joq. Átteń, repressıa zulmaty bolmasa Alash arystary osydan bir ǵasyr buryn-aq qazaq halqyn álemdik órkenıet bıigine shyǵarar edi. Búgingi urpaq osyny umytpaýy kerek. Qazaqtyń ótken tarıhta ketken esesin jańa zamannyń talantty jastary tolyqtyrady dep senemin. – dedi Muhtar Qul-Muhammed.
