Óskemende QR Tuńǵysh Prezıdenti kúnine oraı 140 balaǵa arnalǵan «Darıa» balabaqshasy ashyldy. Mereke qarsańynda ashylǵan balabaqsha tolyqtaı demeýshilerdiń qarajatyna salynǵan.

Saltanatty sharada SHQO ákimi Danıal Ahmetov shaǵyn aýdan turǵyndaryn kele jatqan merekemen quttyqtap, balabaqshaǵa syılyq tabys etti.

– Shyǵys Qazaqstan balabaqsha tapshylyǵynyń aldyn alyp, kishkentaı búldirshinderge barlyq jaǵdaıdy jasap otyrǵan aımaqtardyń biri. Osyndaı úlken mereke qarsańynda sizderdiń shaǵyn aýdandaryńyzda balabaqshany ashý men úshin úlken qurmet. Elbasymyz Nursultan Nazarbaev basqarǵan memlekette jastardyń bolashaǵyna kóptep kóńil bólinip jatyr. Keleshekte dál osy balabaqsha tárbıelenýshileri elimizdiń erteńin qalaǵan patrıot bolatynyna senimdimin, – dedi Danıal Ahmetov.

Jańa 140 oryndyq №13 «Darıa» balabaqshasy 7 topqa bólingen. Onyń 6 tobyna qazirdiń ózinde balalar qabyldandy. Jańa mekemede balalarǵa arnalǵan úıirmeler men oıyn alańdary tolyqtaı jańa jabdyqtarmen qamtylǵan.

Aıta ketsek, balabaqsha ashylyp otyrǵan «Karabah» aýdanynyń turǵyndary balabaqsha tapshylyǵyn aıtyp, birneshe márte máseleni kótergen. Tek oblys ákimdigi «AES Qazaqstan» kompanıalar tobymen memorandýmǵa qol qoıǵannan keıin, balabaqsha qurylysy aımaq basshysynyń baqylaýyna alynady. Jańa mekeme demeýshi qarajatyna salynǵanymen, tolyqtaı qala ákimdiginiń menshigine tapsyryldy.