«SemAZ» zamanaýı otandyq avtokólik qurastyrý zaýyty JSHS-i qazaqstandyq naryqta 9 jyldan astam ýaqyt boıy jumys istep keledi. Zaýyt ózin joǵary tehnologıalyq, joǵary sapaly tehnıkanyń senimdi jetkizýshisi retinde tanytty. Kompanıa avtokólikterdi, tirkemelerdi jáne jartylaı tirkemelerdi jınaý, satý jumystarymen aınalysady.
2006 jyly Semeı avtokólik qurastyrý zaýyty Ońtústik Koreıalyq DAEWOO BUS korporasıasymen birge DAEWOO zamanaýı qalalyq jáne qala mańyndaǵy avtobýstardy shyǵarady. Bul óndiris ımporttalatyn mashınalardyń korpýstary, shanaqtary men agregattaryn jınaqtaýmen ǵana emes, sondaı-aq dánekerleýmen, ramalar men korpýstardy boıaýmen aınalysatyn Qazaqstandaǵy alǵashqy tolyq sıkldi avtokólik qurastyrý kásiporny boldy.
Ózderińiz biletindeı, zaýyttyń ónimderi qazaqstandyq naryqqa ǵana emes, Reseıge de eksporttalady. «DAEWOO» avtobýstary bizdiń qysy qaharly kúrt kontınentti klımatymyzda paıdalanýǵa beıimdelgen senimdi, jaıly kólik bolyp tabylady.
SHQO Kásipkerler palatasynyń baspasóz qyzmetiniń habarlaýynsha, 2009 jyly agroónerkásiptik keshendi damytýdyń memlekettik baǵdarlamasy aıasynda «BELARÝS» traktorlaryn qurastyrý jobasy iske qosylyp, sátti damyp keledi. Búgingi tańda zaýyt 0,2-den 5 tonnaǵa deıin tartý kúshi bar, kez kelgen klımattyq jáne jumys jaǵdaıyna arnalǵan 10-nan astam túrli traktorlar, sondaı-aq ártúrli tirkemelermen jabdyqtalǵan traktorlar shyǵarady. Mundaı traktorlar kóshe-jol jelisin kútip ustaýǵa, ártúrli júkterdi tasymaldaýǵa, sonymen qatar ekskavator-tıegish jáne búldozer-tıegish retinde qoldaný úshin taptyrmas qural.
Qazirgi qatań básekelestik jaǵdaıda zaýyt aldyńǵy qatarly tehnologıalardy qoldanýǵa úles qosyp, qarqyndy damyp keledi. Kompanıanyń dınamıkalyq damý kórsetkishteriniń biri «URAL» jáne «SHACMAN» aýyr júk kólikterin qurastyrýǵa arnalǵan eki jańa jeliniń qurylysy bolyp tabylady.
2006-2017 jyldar aralyǵyndaǵy qysqa, ári qıyn ýaqytta «SemAZ» JSHS-i úlken jetistikterge qol jetkizdi. 2016 jyly «Qazaqstannyń úzdik taýary» nomınasıasynda kásiporyn dıplom jáne eskertkish medalmen marapattaldy. Bul jyly avtoqurastyrý kásiporny «Altyn sapa» syılyǵyna úmitkerlerdiń qatarynda.
