Memleket basshysy qyrǵyz tarapynyń ótinishi boıynsha Sooronbaı Jeenbekovpen kezdesý ótkizdi. Áńgime barysynda Qazaqstan Prezıdenti Qyrǵyzstan Prezıdentin saılaýdaǵy jeńisimen quttyqtady, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

– Eki el arasyndaǵy týysqandyq ári baýyrlastyq qarym-qatynasty ornyna keltirý qajet. Bul jerde eki halyqtyń múddesi tur, – dedi Nursultan Nazarbaev.

Qazaqstan Prezıdenti jýyq arada eki el úkimetteriniń jumys toptary Jol kartasy boıynsha jumys júrgizip, oǵan qol qoıatynyn aıtty. Sodan soń, qyrǵyz tarapynyń ótinishi boıynsha Qazaqstan men Qyrǵyzstan shekarasyndaǵy qazirgi máseleler sheshiletin bolady.

– Shekaraǵa Qazaqstan jáne Qyrǵyzstan taraptary, sondaı-aq Eýrazıalyq ekonomıkalyq odaq ókilderi birlese baqylaý ornatatyn bolady. Mundaı tártipti Qyrǵyzstan-Qytaı shekarasynda da belgilegen jón, – dedi Memleket basshysy.

Sonymen qatar, Nursultan Nazarbaev Qyrǵyzstan Prezıdentin Qazaqstanǵa resmı saparmen kelýge shaqyrdy.

Sooranbaı Jeenbekov Nursultan Nazarbaevqa quttyqtaǵany jáne Qazaqstanǵa resmı saparmen kelýge shaqyrǵany úshin alǵys aıtty.

– Biz elderimizdiń ózara is-qımyl máselelerin talqylap, birqatar ustanym boıynsha ortaq pikirge keldik. Qazirgi problemalarǵa qaramastan, men jeke jaýapkershiligime ala otyryp, shekaramyzdaǵy ahýaldy retteýdi suradym, – dedi Qyrǵyzstan Prezıdenti.

Kezdesý sońynda Memleket basshysy elderimizdiń qarym-qatynasy tatý kórshilik sıpatta ekenin atap ótip, týyndaǵan barlyq máseleni syndarly jolmen sheshýge nıetti ekenin bildirdi.