Qarasha aıynyń 16-18 aralyǵynda Sankt-Peterborda ótetin VI halyqaralyq mádenıet forýmynda «Astana Balet» teatry Qazaqstannyń ulttyq jáne zamanaýı mádenıetiniń kelbetin pash etedi. Bıyl Qazaqstanǵa «qonaq-el» mártebesi berilip otyr. Osynyń ózi Qazaqstan men Reseı Federasıasynyń arasyndaǵy mádenı yntymaqtastyqtyń jańa deńgeıin aıǵaqtap tur.

Ádettegideı, forýmǵa dúnıe júziniń túkpir-túkpirinen mádenıet salasynyń sarapshylary, qoǵam qaıratkerleri men óner tarlandary, bas-aıaǵy 20 myńnan astam adam jınalady: drama, opera jáne balet teatrlarynyń juldyzdary, bılik pen bıznestiń, akademıalyq qaýymdastyqtyń ókilderi.

Forým asynda Qazaqstannyń úzdik shyǵarmashylyq ujymdary óner kórsetedi. Forýmnyń ashylý saltanatynda reseılik kórermenge «Astana Ballet Gala» gala-konserti kórsetilip, balet ártisteri teatr baletmeısterleriniń bı tilimen jetkizgen batyl kórkemdik sheshimderi men biregeı órnekterin pash etedi. Bul baǵdarlamaǵa «Uly Dala murasy» atty jarqyn ári qaıtalanbas horeografıalyq mınıatúralar, «Mahabbat. Aıyrylý. Úreı», «A fuego lento» bir aktili baletteri men «Kleopatra trıýmfy» atty balettiń úzindisi enip otyr.

Ulttyq horeografıalyq plasıka – qazaq mádenıetiniń ózindik bolmysyn kórsetýdiń erekshe quraly. Sol sebepti, «Astana Balet» teatrynyń gastróldik baǵdarlamalaryna ulttyq bı úlgileri mindetti túrde engizilip otyrady. «Uly Dala murasy» baǵdarlamasyndaǵybı kompozısıalary – qazaqtyń keń-baıtaq dalasyn, ulttyq dástúrdiń baılyǵyn sıpattap, ǵajaıyp mýzykasy men qaıtalanbas kórkemdik beınelerin pash etedi. Qazaqtyń ózindik bolmysyn bı tilimen jetkizetin etnografıalyq jáne kórkem bı-baǵdarlamasy elimizde ǵana emes, shet elderde de ystyq yqylaspen qabyldanady.

«Love Fear Loss» (mýzykasy Edıt Pıaf repertýaryndaǵy ánderdiń taqyrybyna jazylǵan, horeograf Rıkardo Amarante) – áıgili Edıt Pıaftyń ǵajaıyp ómirbaıany men ánderinen nár alǵan. Onyń ánderinde túrli er azamattarmen qarym-qatynasy sýrettelgeni belgili. Alaıda, bári bir arnaǵa quıylǵan Pıaf ánderi naǵyz mahabbat uranyna aınalyp, álemdi tabyndyrdy. Balettiń árbir dýeti ińkár sezim, mahabbat, aıyrylyp qalý qaýpi men boıyńdy bılegen úreı sezimderin sýretteıdi.

«A fuego lento» atty kelesi balet, asyl mahabbat sezimine alǵash elitken tusta boıyńyzdy kernegen emosıalyq qýat pen alańdaýshylyq sezimin sóz etedi. Tánińiz erekshe kúıge túsip, shattyq sezimine bólenesiz, al, ishki jalyn boıyńyzdy órtep áketedi. Ǵashyq jan úshin kúlli álem súıiktisiniń aınalasyna toǵysqandaı kórinedi, al, ómirdiń máni tek mahabbat dep biledi(mýzyka -  Lalo Shıfrın, Astor Pássolla, Karlos Gardel, Horeograf – Rıkardo Amarante).

Sonymen qatar, kórermen nazaryna «Kleopatra» baletiniń úzindisi tartý etiledi (Mýzyka – Morıs Ravel, horeograf – Nıkolaı Markelov). Bul týyndy Mysyr patshaıymynyń kópshilikke beımálim kezeńin, ıakı, sińilisi Arsınoıamen taq úshin kúreske túsken shaǵyn baıandaıdy. Kleopatra men Arsınoıa taǵdyr táńirıasy, adam ómiriniń ámirshisi Lahesıstiń nazaryn ózine aýdartpaqshy. Sebebi, Lahesıstiń qolynda Kleopatra men Arsınoıanyń mazasyn alǵan bıliktiń kilti tur.

«Astana Balet» teatrynyń gastróldik saparlary aldyna kúrdeli maqsattar qoıyp otyr: san-túrli horeografıa úlgileri arqyly elimizdiń baı mádenıetin dúnıejúzine pash etý.