Elbasy Nursultan Nazarbaev «Qazaqstannyń 100 jańa esimi» jobasynyń jeńimpazdarymen kezdesti, dep habarlaıdy Qamshy.kz aqparat agenttigi QazAqparatqa silteme jasaı otyryp. 

Jalpyhalyqtyq daýys berý arqyly anyqtalǵan 102 jeńimpazdy elordadaǵy eń kórikti meıramhanalardyń birinde el Prezıdentiniń ózi kelip quttyqtady. Qazaqstannyń týyn bıikke kótergen sportshylar men aq halatty dárigerler, mesenattyqpen kózge túsken beldi kásipkerler men ǵalymdar, mádenıet pen qoǵamdyq salada el aýzynda júrgen azamattar Elbasynyń jyly lebizine bólendi.

«Osy jıynǵa kelgenderińiz úshin qýanyshtymyn. Men úshin eki týǵan kún bar. Birinshisi, ózderińiz biletindeı, ózim týǵan — 6 shilde. Ekinshi týǵan kúnim — 1 jeltoqsan. Bul — qazaq eli búkil halyq bolyp, tuńǵysh ret Qazaqstan halqy Prezıdentin saılaǵan kez. Sol synǵa túsip, tuńǵysh ret 90 paıyzdan astam daýysqa ıe boldym, sodan beri 26 jyl ótti. Sizderdiń barlyqtaryńyz da jassyzdar. Sol kezeń men qazirgi kezeń eki bólek. 26 jylda kóptegen dúnıe ózgerdi. Sol kezeńde ómirge kelgen bala 26 jasta ǵana. Bul jumysqa kirisýde eń jaqsy kezeń», — dedi Prezıdent.

Eske sala ketsek, «Qazaqstannyń 100 jańa esimi» jobasyna daýys berý 100esim.el.kz saıtynda 18 qazan - 10 qarasha kúni aralyǵynda ótken bolatyn. Onlaın-daýys berýge 302 kandıdat usynylyp, úmitkerler qyzmet salasy boıynsha 6 sanatqa bólindi. Iaǵnı, ǵylym salasynda - 45, sportta - 42, qoǵamda - 86, medısınada - 46, mádenıette - 37 jáne bıznes salasynda 46 adam «Qazaqstannyń 100 jańa esimi» jobasyna úmitker retinde tirkelgen bolatyn. Daýys berýge usynylǵan kandıdattar eldiń barlyq óńirlerin qamtydy.

Aıta keterligi, «Rýhanı jańǵyrý» baǵdarlamasy aıasynda uıymdastyrylǵan «Qazaqstannyń 100 jańa esimi» jobasyn iske asyrý nátıjesinde Qazaqstannyń damýyna qomaqty úles qosqan adamdardyń naqty tarıhy mysalynda tabystylyq ıdeıalaryn, merıtokratıa men básekelestik prınsıpterin, bilim jáne pragmatızm kúltyn nasıhattaý jáne damytý arqyly qoǵam sanasyn rýhanı jańǵyrtý kózdeledi.