Tuńǵysh Prezıdent kúni elimizde sońǵy birer jyldyń kóleminde paıda bolǵan aıryqsha merekelerdiń biri. Aıryqsha bolǵanda qalaı, naǵyz máni men mańyzy óte qasterli de qurmetti merekeniń biri.
Ár eldi óziniń arasynan jaryp shyqqan kósemi, ulyǵy basqarady. Qazaq qazaq bolyp jaratylǵaly beri búgingideı jasampaz kúıge enip, jer jahanǵa tanylyp, qoı ústine boztorǵaı jumyrtqalaǵan zamannyń ornaǵany, eń aldymen Táýelsizdiktiń jáne sol egemendikti baıandy qyla bilgen Tuńǵysh Prezıdentimiz Núrsultan Ábishuly Nazarbaevtyń arqasy ekeni aıan. Sondyqtan da qaı salada bolsa da Elbasymyzdyń jasampaz izderi saırap jatyr. Ony urpaqtan urpaqqa jetkizip, qazaq úshin qamdanyp, qyr ótkeldiń ústinde «janym elim úshin sadaǵa» dep qadam basqan el asyly – Elbasynyń ár isine qurmet bildiretin kún bul. Osy kúni sonymen qatar, el ıgiligi úshin de talaı ıgi ister parasy atqarylyp jatatyndyǵyn da kórip júrmiz. Máselen, Tuńǵysh Prezıdent kúnine oraı keń baıtaq eldiń ár óńirinde mektep, balabaqsha, aýrýhana, turǵyn úı syndy áleýmettik nysandar berilip keledi. Bul óte ıgi dástúr. Laıym ol jyldardan jylǵa jalǵasa bersin.
Bıyl Tuńǵysh Prezıdent kúnine oraı Qazaqstan Respýblıkasy Ulttyq ulany «Ońtústik» óńirlik qolbasshylyǵynda da qýanyshty shara ótip, 65 áskerı qyzmetshi otbasy qonys toılaryn toılady. Atap aıtqanda, Almaty qalasy Jubanov kóshesi 10 A mekenjaıynda óńirlik qolbasshylyqtyń qyzmettik jataqhanasy bar bolatyn. Salynǵanyna jarty ǵasyrdan ýaqyt etken baspana keıingi ýaqyttary tipti tozyp, káriz qubyrlary jarylyp, jyldam arada jóndeý jumystaryn qajet etip turǵan bolatyn. Onyń da sáti bıyl túsip, respýblıkalyq búdjetten arnaıy qarjy bólinip, jyl boıynda qarqyndy qurylys jumystary júrgizildi. Endi mine, áskerı qyzmetshiler ıgiligine beriler sát te keldi.
Qonys toıy sharasyn «Ońtústik» óńirlik qolbasshylyǵynyń qolbasshysy general-maıor Qaırat Aqtanov myrza ózi ashyp, izgi tilek, quttyqtaýyn bildirdi.
- Qurmetti áriptester, Elbasynyń salıqaly saıasatynyń arqasyndaelimiz toqsanynshy jyldardyń tolqyndy-tolqyndy aýyr kezeńderinde eteń-jeńin jınap, damýdyń dańǵyl jolyna túse aldy. Zaman ózgerdi, el túledi, Qazaq eli kórkeıdi. Munyń barlyǵy da árıne, ońaı kelgen joq. Ultty ortaq ıgilikke uıytý, el birligin saqtaý, tynyshtyqty qamdaý, óndiristegi órkendi isterge jol ashýdyń barlyǵy da elin súıe bilgen, eldikti bekemdeı bilgen Ult kóshbasshysynyń eren eńbeginiń jemisi. Búgin mine, Tuńǵysh Prezıdent kúnine oraı turǵyn úı kezeginde turǵan áskerı qyzmetshilerimizge qyzmettik baspana berip otyrmyz. Bul da ıgilik. Táýelsizdik ıgiligi, Elbasynyń elimizdi jasampazdyqpen alǵa bastaǵan órkendi isteriniń ıgiligi. Qonystaryńyz qutty bolsyn, - dep atap ótti.
Sharada óńirlik qolbasshylyqtyń Almaty garnızonyndaǵy 5571, 7552, 3660 áskerı bólimderinde jáne óńirlik basqarmada qyzmet atqaratyn bas-aıaǵy 65 áskerı otbasyna qyzmettik jataqhanadaǵy baspana kiltteri saltanatty túrde tabys etildi.
Óz kezeginde «Ońtústik» óńirlik qolbasshylyq qolbasshysynyń tyl jónindegi orynbasary podpolkovnık Narıman Kopeev: «Áskerı qyzmetshilerdiń áleýmettik jaǵdaılaryn jaqsartýǵa basa men berý, olardy turǵyn úımen qamtý - bul memlekettik mańyzdaǵy strategıalyq mindetterdiń biri bolyp tabylady. Bul máselege Ulttyq ulan Bas qolbasshylyǵy udaıy basa nazar aýdaryp keledi. Bul maqsatta jyl saıyn qomaqty qarajat qarastyrylyp, jańa páterler satylyp alynýda. Bıylǵy atalǵan qyzmettik jataqhana tolyqtaı kúrdeli jóndeýden ótkizilip, turǵyn úıdiń barlyq qajetti júıeleri jańartyldy», - dep atap ótti.
Qurylysty ústimizdegi jyldyń aqpan aıynan bastap «Alvıs» JSHS júrgizgen bolatyn. Shara barysynda atalǵan qurylys kompanıasynyń basshysy Narıman Belálovqa Alǵys jarıalandy. Shara sońynda genaral-maıor Qaırat Aqtanov sý jańa baspananyń shymyldyqashar lentasyn qıdy. Sońynan ózi ár baspanaǵa kirip, tanysyp shyqty. Zamanaýı úlgide kúrdeli jóndeýden ótkizilip, shatyry, káriz, jylytý júıeleri tolyqtaı jańarylyp, ishi-syrty tolyqtaı jóndelgen, aýlasy abattandyrylyp, balalarǵa oıyn aýlasy jasalǵan qyzmettik baspanadan bólme alýshylar óz qýanyshtaryn jasarymady. İzgi tilekterin bildirip jatty. Qýanysh kóbeısin!
Maıor Arman ÁÝBÁKİROV,
Almaty qalasy
