2017 jylǵy 1 jeltoqsanda Almaty oblysy Qarasaı aýdanynyń Shamalǵan aýylynda QR Tuńǵysh Prezıdenti - Elbasy N.Á. Nazarbaevtyń «Atameken» tarıhı-mádenı ortalyǵy ashyldy. Shara Almaty oblysynyń ákimshiligi jáne QR Tuńǵysh Prezıdenti - Elbasy qorynyń qoldaýymen uıymdastyryldy, de jazady Qamshy.kz aqparat agenttigi.
Ortalyq Elbasynyń kishi Otanynda quryldy. Onyń maqsaty - qazaqstandyqtar arasynda Elbasynyń shyǵarmashylyq jáne saıası jolyn keńinen taratý, sondaı-aq Prezıdenttiń ómiri men qyzmetiniń aıshyqty úlgileri negizinde jastardyń patrıottyq tárbıesin kúsheıtý bolyp tabylady.
«Atameken» tarıhı-mádenı ortalyǵynda QR Tuńǵysh Prezıdenti – Elbasynyń Qory men Kitaphanasy, Tuńǵysh Prezıdenttiń Mýzeıi, Prezıdent İs basqarmasy, QR Ulttyq kitaphanasy, Shamalǵan aýylynyń mektep-mýzeıi, Qarasaı aýdandyq tarıhı-ólketaný mýzeıi jáne M. Tynyshpaev atyndaǵy Almaty oblystyq tarıhı-ólketaný mýzeıi bergen qujattar, kitaptar, fotomaterıaldar jáne basqa eksponattar jınalǵan.
Jańa ortalyqta hronologıalyq retpen ornalastyrylǵan N.Á. Nazarbaevtyń ómiri men qyzmetiniń, Qazaqstan Respýblıkasynyń qalyptasýy men damýynyń negizgi kezeńderine sáıkes keletin eksponattar ortalyqqa kelýshilerge qazaqstandyq memlekettiliktiń qaıta jańǵyrýy prosesindegi, ekonomıkadaǵy jáne áleýemettik saladaǵy, tarıhı damýdaǵy túbegeıli tereń ózgerister ótkizýdegi jáne Qazaqstannyń HH jáne HHİ ǵasyrlar sheńberinde halyqaralyq bedeliniń nyǵaıýyndaǵy Elbasynyń aýqymdy úlesin, róli men eńbegin kózbe-kóz baǵalaý múmkindigin týdyrady.
Birinshi zalda bolashaq memleket Basshysynyń balalyq jáne jasóspirim jyldaryna, eńbek jolynyń bastalýyna arnalǵan ekspozısıa ornalasqan.
Ekinshi zaldyń eksponattary Elbasynyń odaqtyq respýblıka basshysy qyzmetterin atqarǵan jáne táýelsiz Qazaqstannyń búkil halqy Tuńǵysh Prezıdent etip saılaǵan kezeńderge jatady.
«Atameken» ortalyǵynyń úshinshi zaly Elbasynyń basshylyǵymen iske asyrylǵan aýqymdy qaıta qurýlarǵa, Qazaqstan Respýblıkasy Táýelsizdiginiń shırek ǵasyryndaǵy damý qorytyndylaryna arnalǵan. Sondaı-aq munda N.Á. Nazarbaevtyń týǵan aýyly Shamalǵanǵa ár jyldary barǵan sátteri týraly fotomaterıaldar da bar.
Tórtinshi zalda Elbasynyń syrtqy saıasattyq qyzmeti – Astanada ótkizilgen samıtter jáne EKSPO-2017 qosa alǵandaǵy iri halyqaralyq sharalar, Qazaqtardyń Búkilálemdik quryltaıy, shetelderdiń memleket jáne úkimet basshylarynyń resmı kelgen saparlary týraly materıaldar ornalastyrylǵan.
Elbasyna sheteldik kóshbasshylar tartý etken hattamalyq syılyqtar úlken qyzyǵýshylyq týdyrady.
«Atameken» ortalyǵynda Prezıdent eńbekteriniń, sondaı-aq túrli avtorlar jazǵan Elbasynyń joly týraly kitaptardyń úlken toptamasy jınaqtalǵan.
Ortalyqqa kireberiste Qazaqstan Respýblıkasy kartasynyń aıasynda tanymal músinshi Shamıl Qojahanov oryndaǵan qola kompozısıa ornalastyrylǵan.
QR Tuńǵysh Prezıdenti - Elbasynyń qory erekshe syı – memleket Basshysy paıdalanǵan úkimettik avtomobıldi tartý etti.
QR Tuńǵysh Prezıdenti - Elbasy qorynyń atqarýshy dırektory Qanat Jumabaev: «Biz búgin tarıhı máni bar úlken oqıǵaǵa kýá bolýdamyz. Bul kún barlyq qazaqstandyqtar úshin eleýli bolyp tabylady, óıtkeni Elbasy Nursultan Ábishuly Nazarbaev – qarqyndy áleýmettik-ekonomıkalyq jáne saıası damýy bar memlekettiń biregeı úlgisin jasaǵan zamanymyzdyń tanymal memlekettik jáne saıası qaıratkeri. Elbasy sekildi tarıhı tulǵa bizdiń jastarymyz teńelýge tyrysyp, ózderi úshin durys baǵdar belgileýi, elikteý úshin aıshyqty úlgi bolyp tabylady, al onyń ıdeıalary men eńbeginiń jemisi halyq ıgiligine aınalýǵa tıis», - atap ótti.
