Tórt balanyń anasy qazir Aqtóbedegi daǵdarys ortalyǵynda turyp jatyr. Qatty qınalǵanyn aıtqan kelinshek tártip saqshylarynan kómek suraǵan. Bul týraly aktobenews.kz jazady.

«Áıeldi jelilik polısıa qyzmetkerleri alyp keldi. Tórt balasy bar eken. Eki kún temirjol vokzalynda túnegen. Temirjoldaǵy polısıa qyzmetkerleri kelinshekti ol jerden qýyp jibergen.  Áıel «baratyn jerim joq» dep qaıtyp kele bergen. Úlken balasy 6  synypta oqıdy, kishisi tórt aılyq. Qazir bizde turyp jatyr. Joldasy judyryq jumsaǵan soń, ketip qalǵan. Áıel balalarymen baratyn jer tappaı qınalǵan»,—deıdi «Malıka» daǵdarys ortalyǵynyń dırektory Gúlbadan Daýt.

Ákimdiktiń qoldaýymen ashylǵan daǵdarys ortalyǵynda turmystyq zorlyq kórgen 20-ǵa jýyq kelinshek turyp jatyr.

«Bizge eshqandaı jumysy, qujaty joq kelinshekter de keledi. Olardyń balalaryn balabaqshaǵa, ózderin jumyspen qamtamasyz etemiz. Bizdiń jumysymyzǵa ákimdik qyzmetkerleri kóp qoldaý kórsetedi», — deıdi Gúlbadan Daýt.