Bir jyldan astam ýaqyt túrmede otyrǵan Qazaqstan Jýrnalıser odaǵynyń tóraǵasy Seıitqazy Mataev 4 jeltoqsanda shartty jazamen bostandyqqa shyqty. Almaty oblysy Zarechnyı aýylyndaǵy jalpy qonystaný kolonıasy aldynda Mataevtyń týystary, áriptesteri, jaqtastary men BAQ ókilderi jınaldy. Ol jýrnalıserge jumysqa kirispes buryn, ýaqyt qajet ekendigin aıtty, dep Qamshy.kz aqparat agenttigi Azattyqqa siltep jazady.
«Mende asa qýanysh joq. Sebebi, ulym túrmede otyrǵanda, ózimdi bostandyqqa shyqtym dep eseptemeımin. Biz kinámizdi moıyndaǵan joqpyz. Barlyq aıyptardy teriske shyǵardyq. Bizdiń ulymyz ekeýmizdiń rýhymyz bar. Sol rýhtyń arqasynda berik boldyq. Kek alýdy oılamaımyn», - dedi Seıitqazy Mataev.
Qapshaǵaı qalasynyń soty 16 qarasha kúni Seıitqazy Mataevtyń ózin merziminen buryn shartty jazamen bosatý týraly ótinishin qarap, ony túrmeden bosatýǵa sheshim shyǵarǵan.
2016 jyly 3 qazanda Astananyń Esil aýdandyq soty Mataevty "qarjy jymqyrdy" jáne salyqtan jaltardy" degen aıyptarmen alty jylǵa, al QazTAG agenttiginiń dırektory Áset Mataev "qarjy jymqyrdy" degen aıyppen bes jylǵa sottaǵan. Úkim boıynsha Mataevtar aqparat jáne komýnıkasıa mınıstrligine - 169 mıllıon teńge, "Qazaqtelekom" kompanıasyna 140 mıllıon teńge qaıtarýy tıis bolǵan. Mataevtar ózderine taǵylǵan aıypty moıyndamaıdy. Jergilikti jáne halyqaralyq quqyq qorǵaý uıymdary Mataevtyń sottalýyn aıyptaǵan bolatyn.
Bıyl sáýir aıynda Seıitqazy Mataevtyń jazasyn raqymshylyqqa baılanysty eki jyl segiz aıǵa qysqartqan.
