QR Tuńǵysh Prezıdenti kúni qarsańynda «Nur Otan» partıasynyń Almaty qalalyq fılıalynda bilim, densaýlyq saqtaý, mádenıet pen bıznes salasy ókilderin partıa qataryna qabyldaý jáne «Nur Otan» partıasynyń alǵashqy mýltımedıalyq murajaıyn ashý sharalarynyń saltanatty rásimi ótti.
Murajaıdan «Nur Otan» partıasynyń qurylýy men qalyptasý tarıhyn, partıanyń mańyzdy qujattaryn, sonymen qatar partıa Tóraǵasyna tıesili profesor mantıasyn, kitaptardy, partıa bıletterin jáne basqa da zattardy kórýge bolady.
Munda kelýshiler jobadaǵy partıa tarıhynyń, zamanaýı dızaın men jańa tehnologıalardyń ózara úılesim tapqan erekshe konsepsıasyn baǵalaı alady. Interaktıvti panelder (multi-touch-screen) dástúrli murajaı sórelerin almastyrǵan. LED-ekrannan 10 gıgabaıtty aqparatty sıfrly ekspozısıa túrinde kórýge bolady.
Murajaıdy ashýdaǵy basty maqsat-tarıhı ári mádenı, qoǵamdyq-saıası aqparatty jınaqtalǵan tarıhı qujattar negizinde zertteý jáne nasıhattaý.
«Qazaqstan Respýblıkasynyń Tuńǵysh Prezıdenti Nursultan Nazarbaevtyń esimimen biz Táýelsizdikti, elimizdiń áleýmettik- ekonomıkalyq damý jetistikterin, Qazaqstannyń halyaralyq arenadaǵy bedelin baılanystyramyz. Biz damyǵan memleketter qataryna enýge umtylýdamyz, Memleket basshysy júrgizip otyrǵan jańarý men reformalar básekege qabiletti elder qataryna enýdiń basty sharty. Biz partıa kóshbasshysy N. Nazarbaevqa tirek bolýǵa jáne Qazaqstannyń ıgili jolynda birge jumys isteýge tıispiz!», - dep ún tastady jańa partıa múshelerine Almaty ákimi Baýyrjan Baıbek, ol sonymen qatar Almaty qalasynyń táýelsizdik jyldary qoljetken jetistikteriniń bári Memleket basshysynyń esimimen tikeleı baılanysty ekenin qadap turyp aıtty.
Saltanatty shara barysynda partıa bıletterin «Tamasha» teatrynyń kórkemdik jetekshisi Asylbek Boranbaı, radıojúrgizýshi Dıana Snegına, №140 mektep–gımnazıanyń pedagogy, jyl muǵalimi Gúlbaný Ábjanova, reprodýktıvti medısına Instıtýty bas dárigeriniń orynbasary Lazat Aıtqojına, «ABM GROUP» JSHS basqarmasynyń tóraǵasy Azamat Moldaqasymov, GoSport negizin qalaýshy, «Khan Consulting» JSHS-tiń bas dırektory Ánýar Manabaev jáne «Tradısıı naroda Semırechá» qoǵamdyq birlestiginiń prezıdenti Semen Shıhotov aldy.
Búgingi kúni jalpy respýblıka boıynsha 1 mıllıondaı partıa músheleri bar. Tek Almaty qalalyq fılıalynyń ózinde ǵana 90 myń adamdy biriktirip otyrǵan 750 bastaýysh partıa uıymdary oıdaǵydaı jumys isteýde. Partıanyń qalalyq fılıaly zańdylyqty jetildirý týraly 30 usynys engizgen bolatyn, onyń jartysynan astamy Parlamen Májilisinde maquldandy. Partıa fılıalynda kún saıyn on myńdaı ótinimder qaralyp, júıeli sheshimder qabyldanýda. 10 aı ishinde memlekettik organdarǵa 100-den astam usynys jiberilgen, olardyń 80%-y qabyldandy.
