Shyǵys Qazaqstan oblysynyń jeńil atletıka Federasıasyna (JAF) jańa basshy keldi dep habarlaıdy Qamshy.kz aqparat agenttigi. Bolashaq olımpıada chempıondaryn daıyndaý isine endi aımaq basshysy tikeleı ózi qatysady. 

Aıta ketý kerek, osy aptada Óskemende oblystyq jeńil atletıka Federasıasynyń konferensıasy ótti. Oǵan Olımpıada chempıony Olga Rypakova da qatysty. «Gaýhar lıgasynyń» eki dúrkin jeńimpazy da JAF tóraǵasy – Danıal Ahmetovtyń orynbasary laýazymyna taǵaıyndaldy. Jańa basshysynyń alǵashqy tapsyrmasy boıynsha bir aıdyń ishinde jeńil atletıkany damytý boıynsha baǵdarlama ázirlenýi kerek. Basty maqsat - kásibı «ALTAY ATHLETICS» klýbynyń, sonymen qatar oblys boıynsha osy baǵyttaǵy jumysty bir júıege keltirý.  

– Mundaǵy jumys naǵyz kásibı klýbtardyń deńgeıinde júrgizilgenin qalaımyn. Bizdiń balalar sporttyń bul túrine tabystyń taptyrmas kózi bolatyn mamandyq retinde qaraýlary kerek. Federasıa aldyndaǵy mindet – kúlli Qazaqstan boıynsha jeńil atletterdi taýyp, olardy «ALTAY ATHLETICS» klýbyna alyp kelý jáne jas daryndardy izdeý boıynsha arnaıy júıe qalyptastyrý.

Federasıa taǵy eki komanda qurýdy josparlap otyr. Onyń biri jartylaı kásipqoılar bas qosar el quramasy bolsa, ekinshisi tek qana Shyǵys Qazaqstannyń daryndy balalarynan jasaqtalady. Búginde oblys ortalyǵynda 50 asa bala jattyqtyrylyp jatyr. Aldaǵy tańda jeńil atletıka bólimi Semeıde, sondaı-aq, balalar men jasósipirimderge arnalǵan sport mektepteriniń negizinde de ashylady. 

Esterińizge sala ketsek, qarashada Danıal Ahmetovtyń bastamasy boıynsha SHQO eldegi alǵashqy jeńil atletıkadan kásibı «ALTAY ATHLETICS» klýby qurylǵan bolatyn.  

Dál búgin jeńil atletıka Federasıasy ótkizgen konferensıada Danıal Ahmetov atqarýshy komıtet múshesi laýazymyna taǵaıyndaldy.