Búgin Almaty qalasynda ótken Qazaqstan musylmandarynyń kezekti VIII quryltaıynda Serikbaı qajy Oraz Bas múftı bolyp saılandy, dep habarlaıdy Qamshy.kz aqparat agenttigi.

Quryltaı jumysyna QR Din isteri jáne azamattyq qoǵam mınıstri Nurlan Baıuzaquly Ermekbaev, Qazaqstan musylmandary dinı basqarmasy Tóralqa músheleri, Ǵulamalar keńesiniń músheleri, teolog-ǵalymdar, zıaly qaýym ókilderi, elimizdiń ár oblysynan kelgen quryltaı delegattary qatysty.

Quryltaı jumysynda Qazaqstan musylmandary dinı basqarmasynyń 2013-2017 jyldar aralyǵynda atqarǵan is-sharalarynyń esebi tyńdaldy.

QMDB tóraǵasy Erjan qajy Malǵajyuly Bas múftı laýazymyna naıb múftı Serikbaı qajy Orazdyń kandıdatýrasyn usyndy.

«Qurmetti quryltaı dedegattary, osydan 5 jyl buryn Bas múftı qyzmetine saılanǵanymda bul amanatty abyroımen atqaryp shyǵýdy Alladan surap edim. Sizdermen birge kóptegen aýqymdy is-sharalardy atqardyq. Bul amanatty orynbasarym Serikbaı qajy Orazǵa tapsyrýǵa sheshim qabyldadym. Ol 20 jyldan astam dinı salada qyzmet etip keledi. Dinı basqarma tarıhynda úsh múftıdiń kezeńinde belsendiligimen kózge tústi. Onyń ıdeıasy men iskerliginiń arqasynda kóptegen ıgi jobalar júzege asty. Serikbaı qajy Oraz Bas múftı qyzmetin joǵary deńgeıde atqarady degen senimdemin. Sizder de bul oıymdy quptaısyzdar dep oılaımyn», – dep atap ótti.

Quryltaıǵa jınalǵan 300 delegat Serikbaı qajy Orazǵa daýys berip, biraýyzdan Bas múftı laýazymyna saılady.

Serikbaı Satybaldyuly quryltaı delegaty aldynda dinı salada aıanbaı qyzmet etýge senim bildirdi.

Serikbaı Oraz Satybaldyuly

1975 jyly  12-sáýirde dúnıege kelgen. 

Bilimi:

1990-1992 jyldary Tashkent qalasynda qarılar daıyndaıtyn medreseni tamamdaǵan.

1992-1994 jyldary Mysyrdaǵy Al-Azhar ýnıversıtetinde oqyǵan.

1995-1996 jyldary Islamabadtaǵy Álemdik ýnıversıtetinde bilim kótergen. Almaty memlekettik Abaı atyndaǵy ýnıversıtetinde zań fakúltetin syrttaı  bitirgen.

2012-2014 jyldary "Nur Múbarak" Islam mádenıeti ýnıversıtetinde "Dintaný" mamandyǵyn támamdaǵan.

2012-2014 jyldary M.Dýlatov atyndaǵy Qostanaı ınjenerlik-ekonomıkalyq ýnıversıtetiniń "Menedjment" mamandyǵy boıynsha magıstratýrasyn bitirip, ekonomıka ǵylymdarynyń magıstri akademıalyq dárejesin alǵan.

Eńbek  joly:

Almaty meshitiniń  naıb ımamy;

Islam ınstıtýtynyń ustazy;

Islam ınstıtýtynyń  rektory;

Astana qalasy Aqmola oblysynyń ókil ımamy;

QMDB-tóraǵasynyń orynbasary, naıb múftı;

Almaty ákimshiliginiń dinı bóliminiń sektor meńgerýshisi;

OQO. Saryaǵash aýdanynyń Bas ımamy;

Memlekettik qyzmet agenttiginiń aǵa qyzmetkeri;

Astana qalasy Ádilet departamenti dinı ister bóliminiń bas mamany;

QR Prezıdenti is basqarmasynyń Ákimshilik ǵımarattar dıreksıasynyń dırektory bolyp jumys istedi. Qajylyqqa barǵan.

2011-2013 jyldary Qazaqstan musylmandary dinı basqarmasynyń Qostanaı oblysynyń ókil ımamy qyzmetin atqardy.

2013 jyly naıb múftı bolyp taǵaıyndaldy.

2013 jyldyń qazan aıynda «Áziret Sultan» meshitiniń bas ımamy jáne naıb múftı bolyp qyzmet atqardy.

2017 jyldyń 8 jeltoqsanynda Qazaqstan musylmandarynyń kezekti VIII quryltaıynda Qazaqstan musylmandary dinı basqarmasynyń tóraǵasy, Bas múftı laýazymyna saılandy:  

 Otbasyly, 7 balasy bar.