Reseıdegi Kırov lıseıinde oqıtyn balanyń ákesi muǵalim men onyń advokatyna judyryq jumsady. Bolǵan jaǵdaıdy muǵalim vıdeoǵa túsirip alǵan. Jaǵdaıdyń mán-jaıyn mektep muǵaliminiń advokaty Anton Gladkıh aıtyp berdi. Onyń sózinshe, lıseıde orys tilinen sabaq beretin tanysy odan kómek suraǵan.

Mektep dırektory muǵalimdi shaqyryp, oqýshylardyń biriniń anasy onyń ústinen shaǵym túsirgenin aıtqan. Polısıa polkovnıgi balasynyń muǵalimin tómendetip baǵa qoıatynyn jáne repetıtorlyq úshin aqsha jymqyrady dep aıyptaǵan.

Advokat pen muǵalim dırektor kabınetine kelgende balanyń anasy dóreki sóılep, olardy balaǵattaǵan.

Advokat jala jabý boıynsha sotqa aryzdanbaq nıette. Muny bilgen balanyń anasy bireýge habarlasyp, ózin balaǵattap, ústinen qylmystyq is qozǵaımyz dep qorqytyp jatyr dep shaǵymdanǵan. Osydan keıin kabınetke belgisiz er adam kirip kelip advokatty ura bastaǵan. Advokattyń tisi syndy.

Muǵalim shabýyldy vıdeoǵa túsirip turǵanyn baıqaǵan álgi er adam onyń kózinen judyryqpen urǵan.

Oqıǵa ornyna dárigerler kelip, jábirlenýshilerge kómek kórsetip, alǵan jaraqattaryn fotoǵa túsirip aldy. Advokat balanyń anasyna jala jabý boıynsha, al er adamǵa qol jumsady dep shaǵym túsirmek.

Qazir tekserý jumystary júrgizilip jatyr.