Almatyda kólik reformasy jáne qoǵamdyq kólik júıesin turaqtandyrý aıasynda jyljymaly sostavty jańalaý jumystary júrýde. Jumys sapary barysynda Almaty ákimi Baýyrjan Baıbek №70 baǵyty boıynsha qyzmet kórsetýdi bastaǵan jańa avtobýstardy qarap shyqty.

Qalanyń Jolaýshylar kóligi jáne avtomobıl joldary basqarmasynyń basshysy Maqsut Isahov jeke tasymaldaýshynyń №70 baǵyty boıynsha jetkilikti qozǵalmaly sostavy bolmaýy saldarynan jolaýshylar tarapynan kóp shaǵymdar túskenin aıtty.

«Baǵyt óte qajet, óıtkeni «Kókjıek» yqsham aýdanynan bastalyp, qalanyń ortalyǵyn basyp ótip, «Taýly qyrat» eldi mekeninde sońǵy aıaldamasyn jasaıdy. Qajetti avtobýstar bólý arqyly bul baǵytqa «Almatyelektrotrans» JSHS qyzmet kórsetýi tıis degen sheshim qabyldandy. Bular- kondısıonerlermen, pandýstarmen, vıdeobaqylaýmen jabdyqtalǵan ári eklogıalyq Evro-5 synybyndaǵy 12 metrli tómen edendi avtobýstar. Endi jolaýshylar legi artady degen senimdemiz, - dedi M.Isahov.

Esterińizge salsaq, buryn №86, 65, 103, 50, 126, 112 baǵyttary boıynsha jańa avtobýstar jolǵa shyqqan bolatyn, №77 baǵyty qaıta ashyldy.

Jalpy, bıylǵy jyly Almatyda 388 avtobýs alýǵa qarjy bólingen edi, olardyń 165 – i túrli baǵyttar boıynsha qyzmet kórsetýde, qalǵan 223 –i jyl aıaǵyna deıin iske qosylady.

Kólik reformasy aıasynda jeke tasymaldaýshylar da 254 jańa avtobýs satyp aldy, olardyń 79-y baǵyttar boıynsha júrýde. Jyl aıaǵyna deıin taǵy 32 avtobýs jolǵa shyǵady, qalǵan jańa 163 avtobýs 2018 jyldyń birinshi toqsanynda keledi.