Almaty oblysynda týǵan ulyn birneshe jyl boıy zorlap kelgeni úshin sottalǵan burynǵy mektep dırektoryna qatysty jańa derekter shyqty, — dep habarlaıdy Qamshy.kz aqparat agenttigi tengrinews.kz saıtyna silteme jasaı otyryp.

Dırektordyń ústinen polısıaǵa aryzdanǵan óz áıeli bolyp shyqty. Áıel úlken dáretin ustaı almaıtyn ulyn dárigerge kórsetkeninde, dárigerler seksýaldyq jábir kórgenin aıtqan. Osy jáıtti úıine kelip kúıeýine aıtqanynda, kúıeýi áıelin sabap tastaǵan eken. Al mektep dırektorynyń áriptesteri bul jaǵdaıǵa áli de kúmánmen qarap otyr.

«Joq, senbeımiz. Óıtkeni ol óz qyzmetin dırektor retinde jaqsy atqardy. Jaqsy muǵalim. Deńgeılik muǵalimderdiń úsh aılyq kýrsynan ótken. Aýdanda jarqyn bolashaq atty dırektorlardyń qaýymdastyǵy qurylǵan bolatyn. Sonyń jetekshisi boldy. Qanshama ádistemelik kómek kórsetti», — deıdi Eńbekshiqazaq aýdanynyń bilim bóliminiń aǵa ádiskeri Aıjan Tortaeva.

Eýrazıa birinshi arnasynyń tilshisiniń málimetinshe, osy jaǵdaıdan keıin aýyl turǵyndary kóshege shyǵýǵa jáne balalaryn mektepke jalǵyz jiberýge qorqyp otyr. Mektep dırektoryn meshitten jıi kóretin turǵyndar "syrty bútin, ishi tútin" bolǵanyna sene almaı júr eken.

«Oqýshylar turmaq, bizdiń ózimiz minezin kórmedik. Qatty sóılegenin kórmegenbiz. Áli de senbeımiz... Estigenniń ózinde qatty tańǵaldyq. Qazir de tańǵalyp otyrmyz», — deıdi aýyl turǵyndary. 

«Árıne, qorqynyshty. Aıtýdyń ózi aýyr. Onsyz da zorlaý-qorlaý kóp zamanda. Al mektep dırektoryn estigende múldem sene almaı qaldyq», — deıdi aýyl turǵyndarynyń biri.

Óz balasyn zorlaǵan dırektordyń 15 jyldyq eńbek ótili bar bolyp shyqty. Aty-jóni — Rýslan Islam. Tórt balanyń ákesi shilde aıynda jumystan óz erkimen ketken. Buryn Talǵar aýdanynda muǵalim bolǵan eken.