Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda Medeý aýdanynyń ákimi Erjan Jylqybaevtyń «Urpaqtar sabaqtastyǵy» bastamasymen ótken taǵy bir tamasha kesh №125 bóbekjaı-balabaqsha shańyraǵynda ótti. Ashylǵanyna eki jyl ýaqyt bolǵan balabaqshanyń tarıhy da keremet. 2015 jyly Tuńǵysh Prezıdent kúnine tartý retinde ashylǵan balabaqshanyń bul kún ári týǵan kúni ispetti. Elbasymyz N.Nazarbaevtyń qatysýymen ashylǵan balabaqsha úsh jarym myń sharshy metr aýmaqty alyp jatyr.
Memlekettik jekemenshik áriptestikti damytý baǵdarlamasy aıasynda salynǵan balabaqsha 216 oryndy. Dál qazir 9 toptaǵy búldirshinder memlekettik standartqa saı mektepke deıingi tárbıe men bilimdi ıgerý ústinde. Sonymen qatar, memleketimizdiń jumyspen qamtý baǵdarlamasyn da oryndap otyrǵan bul balabaqsha 3–6 jas aralyǵyndaǵy balalardy orynmen de qamtyp otyr. Elimizdiń barlyq búldirshinderi sıaqty №125 balabaqshanyń kishkentaı balaqaılary «Elbasymen el baqytty» dep atalatyn merekelik is-shara ótkizdi.
«Elbasymyz» dep atalatyn ánmen bastalǵan kesh mazmuny Táýelsiz Qazaqstannyń búgingi beıbit ómiri men tynys-tirshiligine arnaldy. Balabaqshanyń qonaqjaı shańyraǵyna Qazaqstannyń Eńbek Eri, Almaty qalasynyń Qurmetti azamaty Aıagúl Mırazova, qoǵam jáne memleket qaıratkeri Shámsha Berkimbaeva, qalalyq máslıhat depýtaty, «Koktem Group LTD» bas dırektory Murat Ádilhanuly, akter Nurlan Álimjanov, Medeý aýdany ákiminiń orynbasary Ǵanı Maılybaev arnaıy kelip qatysty.
– Men balabaqshaǵa barmaǵaly biraz ýaqyt bolyp edi. Keń ári jaryq, búgingi talapqa tolyǵymen saı kelgen ári elin súıgen, patrıot azamattyń eńbegimen salynǵan ǵımarattyń ıgiligin kórip jatqan búldirshinderge qarap sheksiz rıza bolyp otyrmyn. Árıne, mundaı ıgilikti istiń bári Elbasymyz Nursultan Ábishulynyń tikeleı bastamasymen júzege asyp jatqany anyq, – deıdi Shámsha Berkimbaeva.
Kúni erteń sender de Murat Ádilhanuly aǵalaryń sıaqty el ómirine aralasyp, osyndaı záýlim ǵımarattar turǵyzyp, óz Otandaryńa, óz qalalaryńa tartý etetindikterińe men senimdimin, – degen Aıagúl Tóreqyzy búldirshinderdiń baqytty mekenine tartý retinde ákelgen oıynshyqtaryn tabys etti. Búldirshinderdiń esinde Elbasy beınesimen saqtalyp qalǵan Nurlan Álimjanovty balaqaılar zor qoshemetpen qarsy alyp, aǵalaryna birneshe án aıtqyzdy.
Balabaqshanyń kishkentaı ónerpazdary «Bala Sultannyń balalyq shaǵy» atty shaǵyn qoıylymdy sahnalady. Ánmen órilip, kúımen kómkerilgen kesh kópshiliktiń kóńilinen shyqty. Kesh sońynan ata-analar rızashylyqtaryn bildirip, balabaqsha meńgerýshisi Araılym Qazbekqyzy men onyń ujymyna shyǵarmashylyq tabys tiledi.
