Almaty qalasy Respýblıka saraıynda Almaty qalasy ákimdiginiń bastamasymen Astananyń qalyptasýy men damýyna úles qosqan laýreattardy «Astana – Ardaǵym merekelik syılyǵymen marapttaý rásimi ótti.

«Astana – Ardaǵym»  merekelik syılyǵymen Almaty qalasynda turǵan ári týylǵan jáne Astananyń qalyptasýyna aıtarlyqtaı úles qosqan, Prezıdenttiń astanany kóshirý týraly sheshimine barynsha qoldaý kórsetken qaıratkerler marapattaldy.

«Astana – Ardaǵym» syılyǵy 20 kategorıa boıynsha berildi, olar - bilim men ǵylym, sáýlet pen qurylys, densaýlyq saqtaý, sport, óner, kınematografıa, jýrnalısıka  jáne  ádebıet salalary.

«El eńsesin endi tiktegen kezeńde Elbasy kósh bastap Astanaǵa bet burý týraly sheshimine kúmánmen qaraǵandar  bolǵany belgili. Jasampaz 20 jylda 1997 jylǵa 10 jeltoqsannan bastap el ortalyǵyn resmı Astanaǵa  kóshirýi asqan kóregen sheshim bolǵany ras. Teńdessiz sheshim Alataýdyń baýraıynda qabyldanyp, shaharymyzdyń basty qarjy ekonomıkalyq, ǵylym men bilim, sport ortalyǵy retinde damýyna jol ashty. Osy qalada QR táýelsizdigi týraly zań, jańa elorda týraly tarıhı qaýly qabyldandy. Egiz órimdeı bolǵan qos qalaǵa Elbasynyń qoldaýy erekshe ekendigi ras. Osyndaı qalamyzdyń damýyna kúsh salǵan azamattardyń eńbegin atap ótý durys dep oılaımyn», - dedi Almaty qalasynyń ákimi Baýyrjan Baıbek.

Nomınanttardy irikteý  konkýrstyq komısıanyń saıtynda ashyq daýys berý arqyly júzege asty.

1. Ǵylym-bilim salasynda Astananyń damýyna qosqan úlesi úshin - QR Ortalyq memlekettik mýzeıiniń dırektory Nursan Álimbaı;
2. Densaýlyq saqtaý salasynda Astananyń damýyna qosqan úlesi úshin - №1 qalalyq perzenthananyń bas dárigeri Raqyshev Naýryzbaı;
3. Sport salasyndaǵy Astananyń damýyna qosqan úlesi úshin - burynǵy Týrızm jáne sport mınıstri Temirhan Dosmuhambetov;
4. Bilim berý salasynda Astananyń damýyna qosqan úlesi úshin - ǵalym, jazýshy Myrzataı Joldasbekov;
5. Ádebıet salasynda Astananyń damýyna qosqan úlesi úshin - jazýshy, jýrnalıs Dýman Ramazan men aqyn Maraltaı Raıymbekuly;
6. Qurylys salasynda Astananyń damýyna qosqan úlesi úshin - «Bazıs-A» korporasıasynyń dırektory Aleksandr Belovıch pen ınjener-qurylysshy Osman Shahanov; 
7. Óner salasynda Astananyń damýyna qosqan úlesi úshin - dızaıner Quralaı Nurqadilova men músinshi Bolat Dosjanov, QR Kórkemóner akademıasynyń prezıdenti Amandos Aqanaev;
8. Sáýlet salasynda Astananyń damýyna qosqan úlesi úshin - sáýletshi, QR Sáýletshiler akademıasynyń prezıdenti Aqmyrza Rústembekov;
9. Inovasıa salasynda Astananyń damýyna qosqan úlesi úshin - dáriger-ınfeksıonıst Qarlyǵash Ábdıeva;
10. Aqparat salasynda Astananyń damýyna qosqan úlesi úshin - «Aıqyn» gazetiniń bas redaktory Nurtóre Júsip, fotograf Maksım Zolotýhın, 31-arnanyń bas  prodúseri Nurjan Muhamedjanova;
11. Kınematografıa salasyndaǵy Astananyń damýyna qosqan úlesi úshin - rejıser  Ermek Shynarbaev, akter Ádil Ahmetov;
12. Mýzyka salasyndaǵy Astananyń damýyna qosqan úlesi úshin kompozıtor Marat Omarov, ánshi Naǵıma Esqalıevalar marapattaldy.

Laýreattardyń barlyǵyna 1 mln teńgeden aqshalaı syılyq berildi.

«Jasym 80-ge kelgende ósip óngen, shapaǵatyna bólengen, tálimin alǵan Almatyda talaı qasıetti jıyn bolǵan Respýblıka saraıynda osy saltanatty keshte kezdesip jatqanymyzǵa qýanyshtymyn. Osy zalda QR Tuńǵysh Prezıdentiniń taqqa otyrǵan rásimin ótkizgen edik. Ol maǵan júktelgen edi. Astanadan arnaıy shaqyryp, syılyqpen marapattap otyrǵan Almaty máslıhatynyń depýtattaryna, Baýyrjan inime alǵys aıtamyn», - dedi profesor Myrzataı Joldasbekov.

Eske salsaq, keler jyl Qazaqstan astanasy úshin mereıli jyl. Almatyda Astananyń 20 jyldyǵyn merekeleýge arnalǵan birqatar aýqymdy mádenı sharalar-konsertter, festıválder, kórmeler ótkizý  josparlanǵan.