Qazaqstanda tuńǵysh ret qujatsyz kólik júrgizýge bolatyn boldy. Jańa júıe qazir Almatyda testten ótip jatyr.
QR Premer-Mınıstriniń orynbasary Asqar Jumaǵalıev Almatyǵa jumys sapary barysynda qala ákimi Baýyrjan Baıbekpen birge jobanyń júzege asý barysymen tanysty.
Bul týraly QR Bas prokýratýrasy Quqyqtyq statısıka jáne arnaıy esep komıtetiniń tóraǵasy Baǵdat Mýsın Feısbýktegi paraqshasynda jazdy.
Qalalyq İİD ókilderi laýazymdy tulǵalarǵa E-aıyppul júıesiniń qalaı jumys jasaıtynyn kórsetti.
Kezdesý barysynda qala ákimi Baýyrjan Baıbek qaladaǵy ár jol polısıasy qyzmetkerine planshetpen qamtamasyz etý úshin búdjet qarastyrý kerektigin aıtty.
«Osynyń arqasynda Almaty Qazaqstan tarıhynda júrgizýshileri qujatsyz júretin tuńǵysh qala bolmaq. Asqar Jumaǵalıev Almaty ishinde tehpasport, saqtandyrý polısi, tehnıkalyq baqylaý qujatyn kóterip júrý qajettiligin joıylatynyn málimdedi. Júrgizýshi qujatyna kelsek, halyqaralyq qujattarǵa baılanysty azdaǵan problema bolyp tur. Biraq onyń da sheshimi tabylary sózsiz», - dedi ol.
Aıta ketý kerek, 2017 jyldyń shildesinen bastap Astanada E-aıyppul elektrondy hattama júıesi engizildi.
