Qorqamyn... Jańa jyldyń jaqyndaǵany júregime úreı uıalatady. Nege deısiz be? Múmkin siz úshin jańa jyl úlken meıram, ǵajaıypqa toly kez shyǵar, biraq men úshin olaı emes. Óıtkeni osy bir qarǵys atqyr merekege daıyndyq bastala salysymen, adamdar tobyr-tobyrymen kelip men sekildi shyrshalardy kese bastaıdy. Keıinnen úılerine ákelip, ústimizge qytaıdyń salpynshyqtaryn taǵyp, shoshaq-shoshaqtaryn ilip bereketimizdi qashyrydy. Jarqyraǵan túrli tústi shamdary taǵy bar. Sol bálekettiń kesirinen órtenip ketem be dep zárem ushady. Balalar bolsa meni shyr aınalyp án salyp, bı bılep máz. Týra bir saıqymazaq taýyp alǵandaı. Ol ol ma, qalanyń qaq ortasyna aparyp qoıatyndary da bar. Janyńnan ótken árbir jan sýretke túsip tynym bermeıdi. Shyrshamen túsken sýretti Instagram, Facebook-ke salý qazir «moda». Oǵan da kóndik.

Alaıda men bir nárseni túsinbeımin. Osy qazaqtar jeltoqsan bastalmaı jatyp shyrshamen arpalysqansha, nelikten Táýelsizdik kúnine daıyndyqqa sondaı yjdaǵattylyqpen kirispeıdi? Jap-jasyl etip bizdi merziminen  buryn qoıǵansha, halqy úshin ózderin qurban etken jandardyń sýretterin ilip, rýhyna qurmet bilderse nur ústine nur bolar edi. Nege osy týraly oılanbaıdy eken... Aı, biraq, olardyń oılanýǵa da ýaqyttary joq qoı. Oılanyp otyratyn bolsa, kim shyrshany bezendiredi? Kim dastarhanǵa tamaq alady? Tamaq demekshi, bir aı buryn jańa jylǵa dep tońazytqyshty toltyryp qoıady, biraq jańa jyl jetem degenshe tamaqtyń bári bitip, keıin keri bazarǵa júgiredi. Úıtip-búıtip jańa jyldy da qarsy alady.  Sodan soń meniń qajetim bolmaı, bir qarasam qoqysta jatamyn. Jyl saıyn kóretinim osy. Sonda muny ómir deýge kele me?..

Qýanysh JUBANDYQOV