«Úlken Almaty» aqyly aınalma jolyn salyp beretin ınvestor anyqtaldy.

Úlken Almaty aınalma jolyn salatyn konsorsıým anyqtaldy. Bul týraly búgin «Kazakhstan Global Investment Roundtable» forýmy aıasynda BAQ ókilderine suhbat bergen QR Investısıalar jáne damý mınıstri Jeńis Qasymbek aıtty.

«Úlken Almaty» aınalma joly qurylysyna qatysty sońǵy kelisimshart ta bolady. Tórt kompanıadan turatyn jeńimpaz ońtústikkoreılik-túrik konsorsıýmy anyqtaldy.   Ol  búdjet qarajatynsyz qurylys jumystaryna óz aqshasyn salyp, paıdalanýǵa beredi, odan keıin qarjysyn qaıtarady», - dedi Jeńis Qasymbek.

Onyń aıtýynsha, osy aıdan bastap aınalma joldyń qurylys jumystaryna daıyndyq júredi. Al kún jylyna salysymen, ıaǵnı 2018 jyldyń 1-toqsanynyń sońyna qaraı qurylys alańyndaǵy jumystar bastalady.

«Bul jol úsh jyldan astam ýaqyt salynady ári aqyly bolady. Bul balama jol sanalady. Ol tranzıttik kólik aǵynyn qalaǵa kirgizbeý arqyly Almaty joldarynyń júktemesin aıtarlyqtaı tómendetetin bolady. 60 shaqyrymnan astam jol betonnan salynyp, birinshi sanatty bolady, keı jerleri - 6 jolaqty», - dedi mınıstr.

Qasymbektiń dereginshe, joba quny shamamen 180 mlrd teńgeni quraıtyn bolady.

«Jalpy jobany júzege asyrmaq kezde tosyn jaıttar da boldy. Baıqaý ótkizilgen 2016 jyly teńge baǵamy kúrt ózgeriske ushyrady. Sondyqtan 7 kezeńge sozylǵan kelissózder ótkizildi. 10-nan astam túrli sheteldik konsorsıýmdar boldy. Odan keıin beseýi qalǵan edi. Endi mine, barynsha úzdik shart usynǵan ońtústikkoreılik-túrik konsorsıýmy anyqtalyp otyr. Atalǵan konsorsıýmnyń Úlken Almaty aınalma jolynan da aýqymdy jobalardy salýda tájirıbesi bar», - dedi mınıstr.