QR jáne Qazaq KSRO halyq ártisi Bıbigúl Tólegenova Fýrmanov kóshesin Nazarbaev dańǵyly dep ózgertilýine qatysty pikir bildirdi.
Óner ıesiniń sózinshe, mundaı ózgeriske almatylyqtar tez úırenip ketedi.
«Elbasy óz eliniń damýyna az eńbek sińirdi me? Meniń oıymsha, ol kisi kóshege esimin berýge ábden laıyq tulǵa. Tek qana Semeı polıgonyn jabýǵa sińirgen eńbeginiń ózi nege turady. Men oılaımyn, adamdy tirisinde baǵalaýymyz kerek. Bul durys sheshim boldy. Almatynyń kósheleriniń birine Nursultan Nazarbaevtyń aty berilýi zańdy qubylys dep oılaımyn», - dedi ánshi.
Óner ıesi mundaı ózgeriske almatylyqtar tez úırenip ketpek.
«Biz táýelsiz elmiz. Eldegi barlyq nysandar bizdiń tarıhymyzdan habar berýi tıis. Adamdar Lenın kóshesiniń Dostyq ataýyna, Mır kóshesiniń Jeltoqsan ataýyna úırenip ketti ǵoı. Kóshelerge óz zamanynyń tulǵalarynyń atyn berý óte durys», - dedi ol.
Aıta keter bolsaq, VI shaqyrylymdaǵy Almaty qalalyq máslıhatynyń sesıasynda QR Úkimeti janyndaǵy Respýblıkalyq jáne qalalyq onomastıka komısıalary turǵyndar tarapynan túsken ótinishterdi eskere otyryp, Almatydaǵy Fýrmanov kóshesine Memleket basshysy Nursultan Nazarbaevtyń atyn berý týraly sheshim qabyldady.
2017 jyly qarashanyń 30-y bolǵan Almaty qalalyq máslıhaty sesıasynda tek Fýrmanov kóshesi ataýyn ózgertý týraly ǵana emes, sonymen qatar, Almatydaǵy júzdegen kósheniń ataýyn (kóbi - ataýy qaıtalanatyn kósheler) ózgertý týraly sheshim qabyldanǵan. Sesıaǵa qatysqan Almaty ákimi Baýyrjan Baıbek "Almaty turǵyndarynan Elbasy (Qazaqstan prezıdenti Nursultan Nazarbaevty aıtady - red.) atyna kóshe berý týraly kóptegen ótinishter túskenin" aıtqan.
«Biz bıyl Astananyń 20 jyldyǵyn merekeleımiz. Eger eske alatyn bolsaq, tarıhtyń ózi astanany kóshirý týraly Elbasy sheshiminiń barynsha kóregendi, ári durys ekenin dáleldedi. Sonyń arqasynda Eýrazıa ortalyǵynda jańa zamanaýı qala paıda boldy jáne elimizdiń iskerlik ortalyǵy retinde Almaty jańa serpinmen damı bastady. Tarıhı mańyzy zor sheshim men Prezıdenttiń ekonomıkalyq reformalary ózara ushtasyp, jeke bastamalardy yntalandyrdy, kásipkerlik rýhty damytty. Búgingi kúni Almaty – óńirlik tartylys kúshi, Ortalyq Azıanyń iri megapolısi», - dedi Baýyrjan Baıbek.
Ol Elbasynyń turaqty qoldaýy arqasynda júrgizilgen júıeli reformalar barysynda qala ekonomıkasynyń 100 ese óskenin, shaǵyn jáne orta bıznes qatarynyń 130 ese kóbeıgenin aıtty. Eger sonaý 90 jyldary Almaty İJÓ onnan bir bóligin ǵana berse,búgingi tańda megapolıs ekonomıkanyń besten bir bóligin qamtamasyz etýde, jalpy elimizdiń munaıdan túsetin salyǵynyń tórtten birin berýde, munda shaǵyn jáne orta bıznestiń barlyq óniminiń tórtten biri shyǵarylýda.
«Dál osy qalada Elbasynyń bastamasymen Konstıtýsıany qabyldaý, ulttyq valútany engizý, Qarýly Kúshterdi qurý, memlekettik rámizderdi bekitý, Semeı polıgonyn jabý sıqáty tarıhı ister júzege asty. Sondyqtan Almatyda mundaı sheshimniń qabyldanýy óte oryndy», - dedi megapolıs ákimi.
Aıta keterligi,osydan 10 jyl buryn Qazaqstan Prezıdenti Nazarbaevtyń esimi Iordanıanyń Amman qalasyndaǵy jáne Sheshen Respýblıkasynyń Groznyı qalasyndaǵy kóshelerdiń birine berilgen bolatyn. Bulardan ózge, Qazaqstannyń Tuńǵysh Prezıdentiniń esimimen Túrkıanyń birneshe qalalarynyń kósheleri atalady, Tatarstan astanasy Qazannnyń magıstraldy kóshesine Elbasy esimi berilgen.
