2017 jyly 14 jeltoqsanda Bollıvýdtyń  «Khushi Motion Pictures» kınokompanıasy, Sh.Aımanov atyndaǵy «Qazaqfılm» AQ qatysýymen  (QR Mádenıet jáne sport mınıstrliginiń tapsyrysy boıynsha) túsirilgen «Týǵan úıim- tiregim» («Love you family») atty úndi fılmi ulttyq prokatqa shyǵady dep habarlaıdy Qamshy.kz aqparat agenttigi.

Atalǵan kınotýyndy Hýshı Devanı atty úndi qyzynyń taǵdyry týraly baıandaıdy. Súıip qosylǵan kúıeýinen qorlyq kórgen ol, Almatyǵa kelip, jumysqa ornalasyp, bıikterden kórinedi. 

Esterińizge sala ketsek, byltyr Sháken Aımanov atyndaǵy «Qazaqfılm» AQ Bollıvýdtyń «Khushi Motion Pictures» atty kompanıasymen yntymaqtastyq týraly kelisim shartqa qol qoıǵan bolatyn.  Birlesken óndiris jónindegi kelisim boıynsha, eki jaq  «Love you family» tolyqmetrajdy kórkem fılminiń dıstrıbýsıasy salasynda qyzmet etýge mindettelgen.

- Fılmniń Úndistandaǵy prokaty  tabysty boldy. Qazaqstanda eshqashan bolmaǵan bizdiń kórermender úshin Almaty qalasynyń ádemi kórinisterin tamashalaý qyzyqty boldy. Qazaqstannyń Mádenıet jáne sport mınıstrligine jáne mádenıet mınıstri Arystanbek Muhamedıulyna senim bildirip, qoldaǵandary úshin alǵys aıtamyz. Sonymen qatar, «Qazaqfılm» kınostýdıasyna túsirilim kezinde kásibı deńgeıde kómek kórsetkenderine alǵysymyz sheksiz. Birlesip túsirgen týyndymyzdyń sátti shyqqanyna qýanyshtymyn. Meniń bilýimshe, Qazaqstanda úndi fılmderin súıip tamashalaıtyn kórermender kóp, sondyqtan da bul fılm qazaqstandyqtardyń kóńilinen shyǵady dep oılaımyn, - dedi fılmniń prodúseri Vıpýl Devanı.

Úndi rejıseri Sachındr Sharm túsirgen «Týǵan úıim - tiregim» fılminiń túsirý jumystary Úndistanda jáne Taılandta ótti.  Kartınanyń negizgi qoıylymdaryn Qazaqstanda, aıta ketsek, Almaty qalasynyń kórikti jerlerinde túsirildi (Respýblıka alańy, «Arbat», Shymbulaq jáne Kók-Tóbe).

Fılmge úndiniń tanymal akterleri - Pardasanı Aksha Sýnıl, Djoshı Manoı Navanet, Salman Iýsýf Khan, Shaktı Kapýr, Navnı Parıhar túsken. Bul kartınada qazaqstandyq tanymal akter Farhat Abdraıymov ta boı kórsetedi.   

«Qazaqfılm» kınostýdıasynda qazaq tiline dýblájdalǵan (orys tilinde sýbtıtrlary bar) «Týǵan úıim - tiregim» atty úndi melodramasy elimizdiń kınoteatrlarynan 14 jeltoqsannan bastap kórsetiletin bolady.