Dárigerler ekpe alǵan balalar aýtızm nemese sal aýrýyna shaldyǵady degen qaýesetti joqqa shyǵardy.

Bul týraly Almatyda ótken «Verıt ı jıt» áleýmettik medısınalyq forým barysynda İndetti baqylaý basqarmasynyń bas sarapshysy Nurshaı Ázimbaeva málimdedi.

Mamandardyń aıtýynsha, qazaqstandyqtardyń 95%-y ekpe alǵan. Bas tartqan adamdardyń úlesi 0,1-2 % bolyp otyr.

Ázirge ekpe almaǵan balalar ekpe alǵandardyń arqasynda aýrý juqtyrýdan aman júr.

«Bul másele álemde qyzý talqylanyp jatyr. Qanshama zertteýler júrgizildi. Sonyń arqasynda aýtızm, sal aýrýlarymen ekpe arasynda eshqandaı baılanys joq ekendigi dáleldendi. Buryn mundaı aýrýlar az bolatyn. Bul júktiliktiń aýyr ótýimen baılanysty bolýy múmkin. Otandyq ǵalymdar júrgizgen zertteýler nátıjesinde balalardyń 60 paıyzynda bosaný kezinde qıyndyq bolǵany anyqtaldy. 50 paıyzdan astamy ishte jatyp juqpaǵa shaldyǵady. Ekpe alǵan da almaǵan da balalardyń arasynda ondaı aýyr aýrýlar birdeı kezdesedi», - dedi Nurshaı Ázimbaeva.

Mundaı qaýesettiń taralýyna ınternettegi jazbalar men vıdeolar túrtki bolyp otyr.

«Ekpeden bas tartqan ata-analardyń balalary kerisinshe aýrýlary asqynyp jatyr. Ótken jyly qyzylshaǵa shaldyqqan 9 jastaǵy bala 8 aı boıy aýyrǵan. Bul juqpadan soń balada ensefalıt bastaldy. Ata-anasy barmaǵan jeri joq. Bul aýrýǵa qarsy em joq bolǵan soń balaǵa eshkim kómektese alǵan joq», - dedi Ázimbaeva.

Qazaqstan ulttyq ekpe kúntizbesi boıynsha 2 jastaǵy balalar 10-11 ekpe qabyldaýy tıis. Bala 6 jasqa tolǵanda revaksınasıa júrgiziledi. Odan soń 16 jasqa tolǵansha bir ret ekpe qabyldaıdy.

Aıta ketý kerek, bıyl ekpe qabyldaýdan Qazaqstanda 12 myń adam bas tartqan.