Elbasy qoryna jas ıntellektýal ǵalymdar shoǵyrlanyp jatyr. Bul týraly atalǵan qor janyndaǵy Jas ǵalymdar keńesiniń tóraǵasy, ekonomıka ǵylymdarynyń kandıdaty Mahmýt Tomanov aıtty.

Búgin Almaty qalasynda QR Tuńǵysh Prezıdenti - Elbasy qory ǵımaratynda eki kúndik «Inovasıalyq damý jáne qazirgi Qazaqstandaǵy ǵylymǵa degen suranys» taqyrybymen Hİ halyqaralyq konferensıa bastaldy. Jıynǵa Reseı, Qyrǵyzstan, Italıa, Avstrıa, Qytaı syndy elderden jáne Qazaqstan óńirlerindegi joǵarǵy oqý oryndarynan 200-ge jýyq jas ǵalym keldi. Jıynda basty baıandama jasaǵan qor janyndaǵy jas ǵalymdar keńesiniń tóraǵasy Mahmýt Tomanov basqosýdyń negizgi mindetterine toqtaldy. 

«Konferensıa maqsaty - jas talanttardy tabý. Olardyń ǵylymı izdenisteri sórelerde qalyp qoımaı, júzege assyn dep oılaımyz. Ǵalymdardyń jumysy boıynsha jınaq jaryqqa shyǵady. Bizdiń konferensıamyz Eýrazıa aýmaǵyndaǵy jas ǵalymdar arasynda tanymal. Jas ǵalymdar arasynda túrli halyqaralyq ǵylymı konferensıalarǵa, start-aptarǵa qatysyp, bıikterden kórinip júrgenderi bar. Mysaly, bizdiń ıntellektýal jastarymyz qazirgi tańda «Gýgl», «Býkıng» syndy iri halyqaralyq kompanıalarda óz bilimin dáleldedi. Qazirgi ýaqytta Tuńǵysh Prezıdent qory janynda ıntellektýal jastardyń qaýymdastyǵy shoǵyrlanyp keledi desek bolady. Elbasy bir sózinde memleketimizdiń damyǵan 30 eldiń qataryna enýi úshin ıntellektýal jastardyń kómegi qajettigin aıtqan bolatyn», - dedi M.Tomanov.

Jıynda 6 seksıa jumys isteıtin bolady. Onda tarıh, arheologıa, latyn álipbıi syndy taqyryptar boıynsha sheberlik sabaqtary oqytylady. Uıymdastyrýshylardyń aıtýynsha, jıyn «Rýhanı jańǵyrý» baǵdarlamasy aıasynda ótip otyr.

Eki kúndik konferensıa aıasynda N.Nazarbaevtyń «Bolashaqqa baǵdar: Rýhanı jańǵyrý» maqalasyn talqylaýǵa arnalǵan «Rýhanı jańǵyrý jáne ulttyq tarıhtyń ózekti máseleleri» atty dóńgelek ústel ótedi.

Konferensıa barysynda ǵylymı ınovasıalyq jobalar kórmesi men mektep oqýshylary arasynda robototehnıkadan jarys ótti. Mahmýt Tomanov jas ǵalymdardyń eńbegi bıznes qaýymdastyqtyń nazarynda ekenin aıtty. 

«Biz «Atameken» kásipkerler palatasymen tyǵyz yntymaqtastyq ornatqanbyz. Ónertapqysh stýdentter arasynda baıqaýlar uıymdastyrǵanda qazylar alqasynyń quramyna bıznes qaýymdastyq ókilin kirgizýge tyrysamyz. Sebebi, kásipkerlerdiń ózi jas ǵalymdardyń ınovasıalyq jobalaryn baǵalap, onyń bolashaǵyna jol asha alady. Mysaly bizdiń jas ǵalymymyz adamnyń túrin tanıtyn júıe oılap tapty. Ol batys elderi óndirgen balamasynan 3 ese arzanǵa tústi»,- dedi Mahmýt Tomanov.

Konferensıanyń ekinshi kúni, 24 qarashada Qazaqstannyń áleýmettanýshylaryna arnalǵan sheberlik sabaqtary ótedi.