Beınettiń zeınetin kórý násip etip, Allanyń bergen yrzyǵyn terip jep, qol uzaryp, ýaqyt molaıyp júrip jatqan jaǵdaıymyz bar. Baldan tátti nemerelerimdi saǵynsam, júrdek poıyzǵa otyra salyp júrip kete beretinim bar. Sol ádetimshe, jolǵa jınaldym. Jol júrý – men úshin mereke. Balalarym – balapandarymnyń janynda eki-úsh kún túgili, eki-úsh saǵat bolsam da ájeptáýir demalyp, sharshaǵanym basylyp, quddy áli de bir kórmegen qyzyqtarym, jetpegen belesterim, jańalyqtarym bolatyndaı shabyttanyp ta, shattanyp ta qalamyn. Osyndaıda, «Balam - baldan tátti, nemerelerim – jannan tátti» dep qazekem beker aıtpaǵan-aý deımin. Olardyń táttiligine sheker men bal da jetpeıdi. Nemereńdi qyzyqtap, qylyǵyna qýanyp, solardyń amandyǵyn Alladan tilep júrgenińniń ózi de - bir qol jetpeıtin, tabylmaıtyn baılyq jáne baqyt emes pe! Balalarym – baqytym, balapandarym – baılyǵym. Sol balapandarymdy kórip qaıtpaqqa jıǵan-tergenimdi kóterip jolǵa shyqtym. Jol júrerden buryn, shyny kerek, mende bir tilek bolady. Ol – jolaýshy seriktesterim áıel zaty bolsa eken, ásirese, áńgimeshil, ashyq bolyp kezdesse eken shirkin, deımin, shaı da ishiledi, jol da qysqarady degendeı. Sol oıym oryndalyp, izdegenge suraǵan boldy ma, estigen áńgimeme oralaıyn.
Júrdek poıyzdyń jaıly vagonynan oryn alyp, shyǵaryp salýshylarmen qosh aıtysyp, qala berdim. Sálem-saýqyt salynǵan qol júkterimizdi ornalastyryp jaıǵasqan soń, jan-jaǵymyzǵa qarap sóıleıtin ádetimizshe maǵan qarama-qarsy otyrǵan aq sary júzdi áıelmen amandasyp, «jolymyz bolsyn» aıtysyp, sózge tarttym. «Adam balasy sóıleskenshe, jylqy kisineskenshe» demekshi, adamdar qaıda baratynyn, kimge baratynyn surap, sodan ári áńgime-dúken jalǵasyn taýyp jatatyny belgili ǵoı.
Jasy alpystardy alqymdap qalǵan, tolyqsha kelgen, jyly júzdi aq sary áıeldiń óńinde muńnyń izi, kishirek qoı kózderinde tereń bir syrdyń sarǵaıyp jatqany sezilip turǵandaı kórindi. Alyp shyqqan qant-kámpıt, arnaıy jolǵa pisirgen taǵamdarymyzdy ortaǵa qoıyp, ekeýmiz jarysa qımyldaı bastadyq. Men ózimdi ol áıelden kishirek sezindim de, shaınegimdi kóterip qaınaq sý alyp kelýge kettim. Teginde, jol sapardyń shaıy da, taǵamy da tipti ózgeshe dámdi bolyp ketetini bar. Osy tamaqtyń bári túr-túrimen dastarhanda tursa da, dál osy jolaýshylap júrip ishkendeı keremet bolmaıtyny nege eken dep tańdanatynymyz da ras. Onyń bári adamǵa da baılanysty bolady, eger jolaýshy adamyń áńgimeshil, tipti áńgime aıtpasa da ashyq minezdi bolyp, senimen shúıirkelesip otyrsa da yrza bolyp qalasyń. Árıne, adamdar alýan túrli minezdi, bárine birdeı kiná taǵýǵa da bolmaıdy, biraq, sol qabaǵy qatyp, tyrysyp, «ishimdegini tap» deıtinderden ishim pysyp, ishkenim boıyma sińbeı, ne jol bitpeı, ne ýaqytty ótkize almaı, typyrshyp ketetin kezderim de bolady.
Sonymen, men shaıdy sútpen qoıýlap quıyp, barymyzdy ortaǵa jaıyp salyp, tóńiregimizdeginiń bárin shaıǵa shaqyryp, azyn-aýlaq bastańǵyny bastap ta jiberdik. Jas qyz-balalar aýyz tıgen boldy da, álgi qoldarynan túspeıtin uıaly telefondarymen ymdasyp-sóılesip, ózderimen-ózderi máz-meıram bolyp jatty. Aq sary óńdi áıel óziniń dáriger ekendigin, Astanaǵa nemeresiniń toıyna ketip bara jatqanyn aıtty. Men de tuńǵysh nemeremniń mektep tabaldyryǵyn alǵash ret attaý rásimine bara jatqanymdy aıtyp qalyspaı jatyrmyn. Táıiri, bala-shaǵadan basqa ne áńgime bolýshy edi. Biraz ýaqyt áńgimemiz sol balapandarymyz jaıynda boldy.
Ol: - «Anańyz bar ma?» dep surady. Men anamnyń bar ekenin, seksenniń seńgirine shyǵyp, nemere-shóbere súıip otyrǵanyn, ózimniń eń úlkeni ekenimdi qysqasha aıtyp óttim. «Anasy bar adamdar eshqashan qartaımaıdy» demekshi, Siz áli de jap-jas ekensiz dep, meni biraz jasartyp tastady. «Rahmet komplımentińizge! Siz de asa qartaıyp turǵan joqsyz, kim áke-sheshesin ómir boıy arqalap júrer deısiz, ózińiz de áje bolypsyz» dedim jubatyp ta, kóńilin kóterip te qoıaıyn degen oımen. Qansha eseıip er jetsem de, ózim áje bolsam da, anam bir sát esimnen shyqpaıdy, ásirese, myna bir oqıǵa... dep jolaýshy áıel kómeıine kelgen sózdi jutyp, únsiz qaldy. Óńinen bir nárse aıtqysy kelip, aýzyn ashsa kómeıine kelip qalǵan óksiktiń jasy kóz janaryna úıirilip turǵanyn kórip, beı-jaı qaramadym. Sál kidirgen soń, aıta otyryńyz, aıtsańyz jeńildenip te qalasyz, saǵynyshyńyz da basylady deı berdim ana meıirimine qanbaǵan men beıbaq janym ashyp. Meniń basymnan ótken sher men muńdy ol qaıdan bilsin. Saparlas áıel meniń shyn peıilimmen tyńdaǵym kelip otyrǵanyn túsindi de, áńgimesin bastady...
« ... Otbasymyzda tórt bala óstik. Sheshem marqum on bir qursaq kótergen eken. Zaman qıyn, medısına áli damı qoımaǵan kezeń ǵoı, ómirge kele sala shetineı bergen eken. Solardan tórteýmizge jaryq dúnıe qyzyǵyn kórýge Jaratqan Iem násip etken eken. Shúkir, el qatarly taǵdyr taqtamyzǵa jazylǵan jaqsylyqty, ómirdiń ashshy-tushshysyn kórip jatyrmyz. Ákeden erte jetim qaldyq. Sonaý baılardy kámpeskeleý zamanynda jeti-segiz jasar jetim bala baıdyń malyn aıdap, shekara asyp ketedi. Jetimdi de Jaratýshy ózi jarylqap, kórer qyzyǵy bar, jerde qaldyrmaı, el qataryna qosady. Er jetip, etek-jeńin jıyp, úılenip-jaılanady. Sol jarly baladan men dúnıege kelgen ekenmin. Shet jer, jat el bolsa da qazaqylyǵyn, salt-dástúrin, ádet-ǵurpyn saqtap, ózinikin umytpaı, ózge ulttan emes, óz ultynan qarapaıym qazaqtyń qyzyn izdeıdi. Qazaq qyzyna úılenýdi armandap júrgende meniń anamdy kórip qalady. Qalyń qazaq ta emes, ózge ulttyń ishinde ósken, balalyq, jastyq shaǵy ótken ózge ulttyń tilin de óz tilinen kem bilmeıtin ákem alǵan betinen qaıtpaıtyn qaısar jigit bolyp ósedi. Bir-eki márte kórip-aq anama kóńili ketip, kóp uzamaı otaý qurady.
Balaly-shaǵaly bolyp ómir súrip jatqanmen, júrek túkpirindegi elge, týǵan jerime oralsam degen sarǵaıǵan saǵynysh sanasyn sabalaı beredi. Ol jóninde anama jıi aıtady eken. Aýyrdyń, ıaǵnı aýyrtpalyq ta, jeńildiń, ıaǵnı jeńil ómir, jatypisherlik te óz nátıjesin bermeı qoımaıtyny zańdy. Taǵdyr taýqymetin kóp tartqan ákem qansha emdelse de, emshi dárigerlerdiń emin alsa da saýyqpaıdy. Men bir jasqa tolar-tolmasymda ákem kenetten kóz jumady. Ańyrap anam tórt jetimegimen qaıǵynyń qara sýyn iship qala beredi. Óz jeri de emes, bóten eldiń aty – bóten el. Qaısar anam qasirettiń qara tumanyn seıiltip, jaryq jol izdeýge, elge qaıtýǵa áreket jasaıdy. Jetimekterimdi ıt-qusqa jem qylmaı, keýdemde janym turǵanda týǵan jerime, týǵan-týystaryma jetkizeıin degen oı mazalaı beredi. Kóp qıyndyqtar bastan ótedi, onyń bárin táptishtesem bir sótke ýaqyt ta jete qoımas, toq eterin aıtaıyn dep áńgimeshil áıel ózekti bir máselege aýysty.
Umytpasam bes-alty jasqa kelip qalsam kerek. Qys mezgili edi. Anam qalyń kúrtik qardy ombylaı, jol sala otyryp júrip keledi. Artynan jyǵylyp-súrinip ilesip kelemiz. Keıinderi es kirgende bildim, anam zırat basyna barǵan eken. Ol týraly anam jıi aıtyp otyratyn. Qalyń qarǵa tizerleı otyra qalyp, anam qoıylǵan belgi tasqa betin buryp Quran baǵyshtady jáne kózińniń tirisinde elimizge qaıtamyz, týǵan jerime oralýym kerek dep armandaýshy ediń, mine, balalaryńdy alyp, elimizge ótpekshimiz, baqul bol, yrza bol, amanatyńdy oryndaýǵa bel sheshtim dep uzaq egile jylap otyryp, eriniń rýhymen qosh aıtysyp zırattan shyqtyq. Qaqaǵan qys. Biz únsiz ilbı basyp ilesip kelemiz. Sol kórinis elý jyl ótse de kóz aldymda tur. Sol kóktemde shekara ashylyp elge keldik. Kóp qıyndyqtar bastan ótti. Anam sovhozdyń beldi saýynshysy bolyp jumys istedi. Anamnyń bir sózin eki etpedik. Til alǵysh, tártipti bolýǵa tyrystyq. Eńbekqor bolyp óstik. Anamnyń qabaǵyn baqtyq. Sóz keltirmeýge, uıatqa qaldyrmaýǵa tyrystyq. Jesir áıel namysshyl keletini jasyryn emes. Anam bizdi ákesi barlardan asyp túspese, kem baqpady. Eki bólmeli qorjyn tamda turatynbyz. Shúkir, týǵan-týys, aǵaıyn-jekjattardyń arasyna kelip, qýanyshta shek joq turyp jattyq. Eń mańyzdysy – óz eliń, óz jeriń, óz qandas baýyrlaryń, qarnyń ash bolsa da, kóńiliń toq. Anam saýynshy boldy dedim ǵoı, eń qoıý sút te, qaımaq ta bizdiń úıde. Sheshemmen otyryp ishken qoıý qaımaq qosylǵan kúreń shaıdy aıtsańyzshy! Sol bala kúnimdegi qaımaq qosqan qoıý kúreń shaıdy qazir izdeseń tappaısyń. Bári qospa, tabıǵı eshteńe qalmady. Ákesiz jetim – arsyz jetim, sheshesiz jetim – sherli jetim demekshi, arsyz jetim árkimniń de basynan ótken. Taǵdyr solaı, anamnyń oǵan eshqandaı kinási joq ekenin biz qaltqysyz túsingenbiz.
Kúnder ótip jatty. Birde anam bizdi shaı ústeldiń basyna jınady. Kórshi turatyn ákemniń týǵan inisin de shaqyrǵan eken. Ol kishi atam da kele qaldy. Áńgime basynda biz tórt bala óstik dedim ǵoı, sol eń úlken ápkemiz sol jaqta, baqýatty turatyn qazaq jigitine bireýdiń jalǵyz ulyna turmysqa shyǵady. Ol kisi otbasyly bolǵandyqtan sol jaqta qalyp qoıady. Shekaranyń ar jaǵynda, másele sonda bolyp tur. Anam: Sender elge keldińder. Óz eliń óltirmes. Aınala týǵan-týys, baýyrlar bar. Al, qaınym, aǵańnyń balalary endi saǵan amanat. Baǵa alsań baǵarsyń, qıynsynsań balalar úıine ókimetke ótkizersiń dep qadap aıtty. Eshqandaı aldaýsyratpaı, shynaıy ashynyp aıtty. Meniń tuńǵysh qyzym jat jerde qalyp ketti. Túnde uıqydan, kúndiz kúlkiden qaldym. Sol qyzym kóz aldymnan keter emes. Uzynqulaqtan estýimshe shekara úsh kún ishinde jabylatyn kórinedi. Buıyrsa osy úsh kún ishinde shekara asyp alyp qaıtam, buıyrmasa men sonda ólip qaıtam dedi. Biz sol mezette shyr ete tústik. Tizesinen qushaqtap óksip jylaǵanymnyń bári kóz aldymda. Anam qansha ishteı qımaı tursa da, jigerlenip bizdi tyıyp tastady, qaırattansyn dep qatty aıtty, jylaýyq bolmasyn, jigerli bolsyn, jankúıer bolsyn, jalqaý, janaıar emes, jankeshti ómirge beıimdelsin, jaqsy bolsyn, ómir atty dúrmektiń kóshinen qalmaı el qatarly adam bolyńdar dep tileı otyryp tilip aıtty. Jylamaq túgili tilimizdi jutyp qoıǵandaı ishteı tynyp, tunjyrap, jylamsyraǵan kúıde otyryp qaldyq. Eresek aǵamda da ún joq. Men sút kenjesi bolǵan soń eteginen bir eli qalmaı óskenmin, ileskim kelip tursa da únim shyqpaı ishteı tunshyqqan kúıde qala berdim. Úı janyna kelip toqtaǵan aǵash bortty bıik mashınaǵa artyna burylmastan qarǵyp mindi de júrip ketti. Kóz jasyn bizge kórsetkisi kelmeı, sondyqtan ile-shala ketkenin biz keıin eseıe kele túsindik. Kóz ushynda kórinbeı ketkenshe qarap turdyq. Anam kete salysymen úsheýmiz úsh jerde tomsyraıǵan kúıde ne jylarymyzdy bilmeı otyryp qaldyq. Balamyz ǵoı, tereń túsine qoımaǵan da shyǵarmyn, qarnym toq, kórshi-qolań balalarmen oınap ketsem kerek, eki-úsh kúndeı ýaqyt ótti-aý deımin. Bir kúni keshki mezgil bolatyn, anam kirip keldi. O toba! Alǵashynda tanymaı da qaldyq. Sheshem ekenin bilip turmyn, biraq, syrt bet-álpetine qarasam adam shoshıtyndaı halde edi. Bala bolsam da osy kórinisti umytpaımyn. Shur etip, enteleı jabyla aıaǵyna orala kettik, qushaqtap jylap shyryldap jatyrmyz, qýanyshtan ǵoı, árıne. Jýynyp-shaıynyp óz-ózine kelgen anam eki-úsh kúnniń ishinde kórgen-bilgen áńgimesin aıta bastady. Mańdaıynan, shekesinen, eki shyntaǵynan, tizesinen saý jer joq. Terisi alynyp, jalbyrap turǵan tizesi men shyntaǵynyń qany áli de keýip úlgermegen. Anamnyń sol beınesin eske alsam, qaıran anashym-aı, balasy úshin janyn qıýǵa da ázirlenip ketken ekensiń-aý dep muńaıamyn! Ol ýaqytta qazirgideı jeńil, jumsaq kólik qaıda...! Sol ózi otyrǵan aǵash bortty júk mashınasy shekaradan ótip jatqan eldiń júgin tasıdy eken. Júrgizýshiniń janyna otyrýǵa bolmaıdy, shekarada tekserýshi ótkizbeıdi. Ne isteý kerek? Ustalsa, sóz joq, jaý dep atyp tastaýy anyq. Júk salatyn bortyna shyǵyp, aǵash pa, temir me, kim bilsin, edenge etpetinen tybyr etpeı jatady, ústine brezent palatany tastaı salady. Salmaǵy da az emes, kún ystyq, aýa jibermeıtin rázińke. Astyna tóselgen eń bolmasa ne shóp, ne kórpe de joq, qýraǵan qý taqtaı bolar. Qaıbir dańǵyraǵan tas jol deısiz, qıqy-jıqy, kedir-budyr jol shaıqalǵan saıyn baspen de, tizemen de uryla-uryla qajalǵan jup-juqa, jumsaq teriden ne qalady, elestetip kórińizshi?!
Shekarada tekserýshi soldat ta bortqa shyǵyp, moınyn sozyp suraǵan kórinedi. Shofer jigit (orys jigiti) ózge tilde birdeńe jóninde surady-aý deımin, asa kóp ustap teksermegen kórinedi, ary qaraı júrip ketedi. Allanyń jarylqaǵany osy da, jaqsylyǵy, sender anasyz qalmasyn degen shyǵar, ádette temir istikpen túrtip-túrtip tekserýshi edi, sol joly asa kóp tekseris bolmaǵan eken. «Aqqa Qudaı jaq» degen osy ǵoı, aman-esen shekaradan óttik. Arǵy betke ótken soń shofer jigit jol-jónekeı túsirip ketedi. Jota-jotany jaılaǵan el, saıda myńǵyraǵan mal, ár jerde top-top bolyp jınalǵan elden jáne qara-qurym maldan jer qaıysady. Júrgen adamdardan suraı-suraı áreń degende qyzy kelin bolyp túsken shańyraq ta, ıaǵnı qudalary da osy kóshtiń ishinde ekenin biledi. Botasyn izdegen ingendeı, janary jaýtańdap kúni boıy balasyn izdeıdi. Erteńinde taǵy izdeýge shyǵady. Tórt-bes er adamdar bir shette áńgimelesip turady, jaqyndap kelse tanı ketedi. Mázire-jaı áńgime-dúken quryp turǵandardyń biri qudasy bolyp shyǵady. Oıda-joqta tap bolǵan qudaǵıyna ol kisi alǵashqyda ań-tań bolsa kerek. Amandyq, hal surasqannan keıin qyzynyń jaıyna aýysady. Qudasy bala-shaǵasyn túgel tastamaı kóship kele jatqanyn, bári din-aman ekeninen habardar bolady. Kóńil ornyǵady. Endi qyzyn óz kózimen kórý kerek qoı. Qudasy anaý saıda úı tigip otyrǵandaryn aıtyp, úıge júrińiz dep izet jasaıdy. Endi anam sol jaqqa qaraı betteıdi. Jardy jaǵalaı jyldamyraq basyp júrip ketedi. Ana júregi balasyn kórmeıinshe tynshyǵan ba?! Júrektiń qalaı týlap turǵany árkimniń ózine ǵana aıan. Saǵynysh ta, aıanysh ta keýdege syımaı turǵanyn tek ana ǵana túsinedi. Qaıǵyrady, júregi únsiz jylaıdy. Sharq urǵan ana júregi eseleı soǵady, asyqtyryp keledi. Kenet, jotany jaǵalap kele jatsa óz qulynynan aýmaıtyn qara tory qyz ıin aǵashpen saı tabanynan kóterilip keledi eken. Jaqyndaı tússe, dál ózi. İzdegen óz botasy ekenine kózi jetken soń, ana saı tabanyna qaraı ekpindete júgiredi. Qyz da tanı ketedi, eki shelegin tastaı salyp, órge qaraı eki qolyn jaıyp, «apalap» qarsy júgirdi. Saǵynyshtyń sarǵaıǵan sary jeli de jas botasyn artynan ıterip, saıdan shyǵýyna demep te jatyr ma, áp sátte anasy men qyzy qushaqtasyp kóriskende kók aspannyń ózi kúńirenip, kók ózen týlap, dúnıe túgel astan-kesten bolyp aınalyp turǵandaı kórindi. Ekeýi uzaq qushaqtaryn jazbaıdy. Saǵynyshtyń jasy betterin jýady. Anasynyń betindegi súrilgen jaranyń daqtaryn kórip botasy bozdaǵanda, tóńirek túgel eńirep, ana bitken ańyrap, aspannan qara nóser jaýǵandaı kóz jastary sel bolady. Er adamdar, úlkender jaǵy kele qalady, ázer degende juptaryn jazyp jýatady. Anasy qyzynyń janynda bir kún bolyp, elge qaıtatynyn, áne-mine ótkeli otyrǵandaryna kózi jetedi. Qudasy men qudaǵıyna qyzyn amanattap tapsyryp, keri qaıtady. Birneshe saǵat túndeletip jaıaýlaı jalpylaı júrip, temir tordyń astynan eńbektep ótip, elde qalǵan úsh botaqanyna qaıtyp keledi. Kirip kelgendegi bet-álpetindegi ózgeris sol oqıǵanyń salǵan jarasy eken. Tán jarasy jazylary ońaı bolǵanmen, jan jarasynyń jazylýy qıyn eken, áste. Anamnyń sol keıpi, sol eki-úsh kúndegi qınalǵanyn túsingen janǵa jan jarasy emeı ne dersiń?! Kóp uzamaı-aq, sol apaıymyz ýádeli ýaqytta shekaradan ótedi. Anam óz kózimen qyzyn kórip, kóńili ornyǵady. Olar basqa aýdanǵa qaraı kóship ketedi.
Odan beri de birneshe jyldar ótti. Anamnyń ómir salǵan aýyrtpalyqtan densaýlyǵy nasharlaı bastaıdy, nebári on shaqty kún tósek tartyp jatty da, máńgilikke kóz jumdy. Ómiriniń sońyna deıin (tek sol on shaqty kúnnen basqa) bes ýaqyt namazyn tastamaı oqyp ótedi. Anam musylman áıelge laıyq mindetterin ótep ketti. «Áttegeni» tek, sút kenjem dep erkeletetin meniń úılenip, otaý qurǵanymdy jáne nemerelerin kórmeı ketti. Ózim alpysty alqymdap áje bolsam da, anamdy saǵynamyn. Analary bar adamdarda arman da joq shyǵar dep jasym ulǵaıǵan saıyn kóp oılanatyn boldym... », - dep kirpigine ilingen saǵynysh pen ókinish jasyn syǵyp aldy da, ishteı kúbirlep anasynyń rýhyna duǵa jasap sarǵaıǵan syrshyl áńgimesiniń núktesin qoıdy.
Men únsiz tyńdap otyryp ýaqyttyń qalaı ótkenin de baıqamaı qalyppyn. Jolaýshylar túgel uıqyda. Poıyz dúrsildete zýlap keledi. Iá, dál Sizdeı anasyn syılaıtyndar, jáne jan-tánimen shynaıy jaqsy kórip, shyn qurmetteıtin perzentter kóp bolsa ǵoı, jáne et júregim, baýyr etim deıtin, bala úshin ómirin de qıatyn Sizdiń anańyzdaı naǵyz er analar kóp bolsa ǵoı dep tereń oıǵa battym.
Balasyn deımin-aý, aıaqtanǵan, úıli-jaıly bolǵan, ata-enesi bar eresek balasyn jat jerge tastamaı taǵdyryna alańdap, sol úshin basyn ólimge tikpek turmaq, dúnıe esigin jańa ashqan sharanasyn, tula boıyn jaryp shyqqan perzentin, beıkúná sábıin qoqysqa tastap ketip jatqan «ana symaqtarǵa», dúnıeqońyzdyqpen balasyn saýdaǵa salyp, shetel asyryp jatqan kókek analarǵa mynadaı naǵyz Analardyń erligi - úlgi-ónege bolsa, shirkin! Estigenimdi ózim ǵana bilip qoımaı, ózgeler de estisin, elekten ótkizsin, oılansyn degim keledi.
Jolaýshy áıel anasynyń kóz jumǵanǵa deıin bes ýaqyt namazyn qaza etpeı oqyp ótkenin aıtty. Osyǵan oraı, mynadaı hadıs te bar: « «Men jáne balalaryna qamqorlyq jasap taýqymet kórgen áıel ekeýmiz qıamet kúni budan da jaqyn otyramyz», - dep Paıǵambarymyz (s.á.s.) suq saýsaǵy men ortańǵy saýsaǵynyń arasy qanshalyqty jaqyn ekenin kórsetti». Peıishtiń tórinen oryn alýǵa laıyq Analarymyz kóp bolsyn degen tilekpen osy maqalany jazdym. Ananyń shynaıy erligi esh ýaqytta umytylmaq emes!
Rysken Rahymqyzy ÁBİSHEVA
QazUÝ-dyń aǵa oqytýshysy, fılologıa ǵylymdarynyń kandıdaty
Almaty qalasy
