Qazaqstandyq aýyr atlet Ilá Ilın dopıngpen ustalǵan sportshylardy alaıaq dep sanaýǵa qatysty pikirin bildirdi, dep habarlaıdy Sputnik Qazaqstan.
"Men bizdi alaıaq dep sanamaımyn. Óıtkeni biz ondaı emespiz, jetistikterge jetý úshin kún-tún demeı, qara terge túsip eńbektenemiz. Menińshe, alaıaqtar basqa "formattaǵy" adamdar. Olımpıada "altynyn" jeńip alǵanda, mıllıondaǵan adam seniń qýanyshyńa ortaqtasyp, qýanyshtan kózderine jas alady, al alaıaqtarǵa ondaı qurmet kórsetilmeıdi. Biz Olımpıadada jeńiske jetý úshin 9-10 jyl ózimizdi kóp nárseden shekteımiz, biraz dúnıeden bas tartamyz", — dedi atlet búgin ortalyq komýnıkasıalar qyzmetinde ótken brıfıńte.
Ilın aqsha úlken stımýl bolǵanymen, sportshylar úshin aqshadan bıik maqsattar bar ekenin aıtty.
"Árıne aqsha sportshyny yntalandyrady, biraq bizdiń maqsatymyz odan da joǵary. Biz aqsha úshin jumys istemeımiz. Men keıde adamdar osyndaı suraq qoıǵanda tańǵalamyn. Bir kún nemese bir apta bizdiń zalǵa kelip, ondaǵy atmosferaǵa kýá bolsańyzdar, bizdi túsinesizder. Onda qýanysh ta, kóz jasy da, muńaıý da, jabyǵý da – bári bar. Biz qanshama psıhologıalyq kúızelisti bastan keshiremiz. Iá, biz qıyn jaǵdaıǵa tap boldyq. Biraq bul tek meniń nemese bizdiń qyzdardyń ǵana emes, sport salasyndaǵy problema. Sondyqtan menińshe, bizdi alaıaqtar qataryna jatqyzý durys emes. Biz el ıgiligi úshin jumys istep júrmiz", — dedi Ilın.
Sportshy eger memleket páter men kólikti keri surasa qaıtarýǵa daıyn ekenin aıtty.
Esterińizge salyp ótsek, Ilá Ilın dopıng synamasynda tyıym salynǵan zattar tabylǵannan keıin, 2008 jylǵy jáne 2012 jylǵy Olımpıadalarda jeńip alǵan altyn medalinen aıyrylǵan bolatyn. IWF tártiptik komısıasynyń sheshimimen, aýyr atlet eki jylǵa sporttan shettetildi. QR Aýyr atletıka federasıasynyń kómegimen sportshy Olımpıadadan basqa dodalarda alǵan marapattary men tıtýldaryn saqtap qaldy.
Dıskvalıfıkasıa zańbuzýshylyq anyqtalǵan sátten bastap, ıaǵnı 2016 jyldyń 10 maýsymynda kúshine endi.
Osylaısha, Ilınniń sporttan shettetilý merzimi 2018 jyldyń maýsymynda aıaqtalady, sodan keıin sportshy Tokıoda ótetin Olımpıadaǵa qatysa alady.
Aıta ketsek, Ilá Ilın – úsh túrli salmaq dárejesinde tórt dúrkin álem chempıony, 94 keli salmaqqa deıingi Azıa oıyndarynyń eki dúrkin chempıony.
