Ulttyq qaýipsizdik komıteti Sırıa men Iraktaǵy qarýly qaqtyǵys aımaǵynda qalǵan qazaqstandyq balalar sanyn aıtty dep habarlaıdy Qamshy.kz aqparat agenttigi sputniknews.kz-ke silteme jasaı otyryp.
UQK tóraǵasynyń orynbasary Nurǵalı Bilisbekovtyń málimetinshe, qazirgi ýaqytta Sırıa-Irak aýmaǵynda 16 jasqa deıingi 390 bala bar – 214 ul, 176 qyz. "Birden aıtyp óteıin, osy sandy tilge tıek etip otyrsaq ta, shyn mánisinde sonsha balanyń tiri júrgenine kepildik bere almaımyz. Álbette, olar belsendi áskerı operasıalar, Sırıa áskeri men koalısıalar aımaǵynda. Atalǵan balalardyń bári aman-esen dep naqty aıta almaımyz", — dedi Bilisbekov "Ekstremızm men terorızmge qarsy is-qımyl máseleleri boıynsha Qazaqstannyń keıbir zańnama aktilerine ózgertýler men tolyqtyrýlar engizý týraly" zańdy júzege asyrý jónindegi múddeli memlekettik organdar kezdesýi barysynda.
UQK málimetine súıensek, bombalaý aımaqtaryna Qazaqstannyń azamattary da tap bolyp jatady.
"Biz qaıta tekserýge tyrysyp jatyrmyz, bul óte qıyn jumys – ol jerde eshqandaı konsýldyq qyzmet joq, bıliktiń ózi qaqtyǵys aımaqtaryn baqylaýǵa qaýqarsyz, degenmen bul jumysty atqarýǵa barynsha kúsh salyp jatyrmyz", — dep sendirdi UQK tóraǵasynyń orynbasary.
Qazir Qazaqstanǵa 63 bala qaıtarylǵan, taǵy 50 balany alyp kelý josparlanyp otyr. "Bul balalardy ońaltý úshin qaýyrt jumys isteýmiz kerek bolady", — dep atap ótti Bilisbekov.
