Ońtústik Qazaqstan oblysy Tóle bı aýdanynda Táýelsizdik kúni merekesine tartý retinde 5 qabatty 8 turǵyn úı  paıdalanýǵa  tapsyryldy dep jazady inform.kz.  Kóp qabatty turǵyn úıdegi  páterdiń kilti «Nurly jer» baǵdarlamasy boıynsha tólebılik 480 otbasyǵa berildi. Bul týraly óńirlik ákimdiktiń baspasóz qyzmeti habarlaıdy. Jańa qonys Tóle bı aýdany Lengir qalasynyń 1-móltek aýdanynda boı kótergen. Saltanatty sharaǵa oblys basshysy Janseıit Túımebaev, oblystyq máslıhat hatshysy Qaırat Balabıev, «Nur Otan» partıasy OQO fılıaly tóraǵasynyń birinshi orynbasary Nurmahan Joldasov  bastaǵan halyq qalaýlylary qatysty.

Turǵyndardy arnaıy merekemen quttyqtaı kelgen Ońtústik Qazaqstan oblysynyń ákimi J.Túımebaev páter kiltterin jetim jáne ata-anasynyń qamqorlyǵynsyz qalǵan balalarǵa, áskerı jáne búdjettik mekeme qyzmetkerleri men áleýmettik az qamtylǵan otbasylarǵa saltanatty túrde tabys etti. «Bizdiń basty mindetimiz - halyqtyń áleýmettik jaǵdaıyn jaqsartyp, sapaly qyzmet kórsetý. Oblys, aýdan ortalyqtarynda, eldi mekenderde turǵyn úıler salynyp jatyr. Sonyń bir dáleli - búgin Sizderdiń aýdandaryńyzdaǵy 8 kóp qabatty turǵyn úıdiń qurylysy aıaqtalyp, 480 otbasy baspanamen qamtamasyz etilip, qýanyshqa bólenip otyr. Bul baǵyttaǵy jumystar barlyq eldi mekenderde Elbasymyzdyń «Nurly jer» baǵdarlamasy aıasynda jáne jergilikti, oblystyq búdjet esepterinen jalǵasyn taba bermek», - dedi ákim.

Tóle bı aýdany turǵyn úılerdiń qurylysyna 2016-2017 jyldary oblystyq búdjetten 2 mlrd. 735 mln. 406 myń 084 teńge qaralyp, búginde tolyǵymen ıgerilip otyr. Nátıjesinde 29 264 sharshy metr turǵyn úı el ıgiligine berildi. Qazirgi tańda komýnaldyq turǵyn úı kezeginde aýdanda jalpy 2961 adam kezekke tirkelgen. Olardyń ishinde 1676 adam halyqtyń áleýmettik jaǵynan álsiz toptaǵy, 345 azamat jetim jáne ata-ana qamqorlyǵynsyz qalǵan balalar tiziminde bolsa, 940-y memlekettik pen búdjettik qyzmetkerler tiziminde tur.