Almatyda SHOB sýbektileri úshin saýda alańdaryn qurý máselesi talqylandy.
Almatyda «Qazyna kapıtal Menedjment» kompanıasynyń uıymdastyrýymen shaǵyn jáne orta bıznes sýbektileri úshin saýda alańdaryn qurý máselesi talqylandy.
Jıynda tikeleı ınvestısıa qorlarynyń qatysýymen orta jáne shaǵyn bıznes sýbektileri saýda alańdaryn qurý múmkindigi qarastyrylýda. Talqylaýǵa kásipkerler, Qazaqstan qor bırjasy (KASE) tikeleı ınvestısıalar qoryn basqaratyn brokerlik kompanıalardyń ókilderi qatysty. «Qazyna Kapıtal menedjment» dóńgelek ústel barysynda ınfraqurylymdy damytýdyń 3 balama nusqasy kórsetilgen taldaýmen tanystyrdy.
«Halyqaralyq tájirıbeni eskere kele 3 tujyrymdama shyǵardyq. Birinshiden, KASE bazasynda arnaıy saýda alańyn qurý, ekinshiden, bırjalyq emes naryq tájirıbesin qoldaný, úshinshiden, arnaıy paı qorlaryn qoldaný tujyrymdaryn usynamyz», - dedi CKIF dırektory Daýren Ońaev.
Maman Qazaqstandaǵy shaǵyn jáne orta bıznes formalarynyń ereksheligin eskere kele KASE bazasyndaǵy arnaıy saýda alańynyń ereksheligin anyqtap kórsetti.
«KASE bazasynda JSHS-lardy bırja alańyna shyǵaratyn mehanızmniń arnaıy ınfraqurylymy qalyptasqan. Bul bizdiń negizgi nusqamyz. Munda naryq qatysýshylarynyń arasyndaǵy qarym-qatynas jaqsy qalyptasqan. Brokerlik kompanıalar túgel kórsetilgen. Sonymen qatar, KASE bazasyndaǵy alań ashyqtyq qaǵıdattaryna tolyq jaýap bere alatyn edi. Biraq bul jaǵdaı reglamentteýdiń normatıvtik qujattaryn, bırja erejesin, zańdardy ózgertýge týra keletin edi. Al ekinshi nusqa OTS formatyndaǵy balama - ekijaqty tikeleı saýdany bildiredi. Satýshy men satyp alýshy bir-birin arnaıy alań arqyly taýyp alady. Mundaı alańdy qurý aqparattyq ınfraqurylymdy talap eteri sózsiz. Bul jaǵdaıda kompanıalar aýdıt, esep berýge daıyn bolýy tıis. Investorlar aqparatty arnaıy alań arqyly ózderi taýyp alady. Úshinshi balama usynys - Paı ınvestısıalyq qorlar arqyly alań ashý. Basqarýshy kompanıa bul jaǵdaıda qatysýshylardyń úlesin alańǵa shyǵarýmen aınalysatyn bolady. Bul basqarýshy kompanıa qorlarmen de baılanysta bolady. Bul balama boıynsha da zańda shekteýler kóp», - dedi Dáýren Ońaev.
«Qazyna Kapıtal Menedjment» basqarma tóraǵasy Asqar Dostıarovtyń aıtýynsha, tikeleı ıvnestısıa aǵymy qarjylyq naryqtyń damýyna tikeleı baılanysty. Qarjy naryǵynyń keıbir bólshekteriniń jetispeýshiligi mysaly SHOB úshin saýda alańy, ınvestısıalyq qorlar úshin ekinshi deńgeıli naryq kóptegen kompanıalarǵa private equity júıesiniń jolyn jabady jáne halyqaralyq ınvestorlardy tartýǵa kedergi keltiredi.
«Bul másele - qor naryǵy arqyly balama jolmen shyǵý strategıasy bizde nege joq? Osy másele jazda kóterilgen bolatyn. Halyqaralyq tájirıbeni eskere kele private equity naryǵy qor naryǵynyń damýyna tikeleı baılanysty ekenin túsindik. Tikeleı ınvestısıa qorlary qor naryǵynyń alańyn paıdalana otyryp, potensıaldy klıentterin qalyptastyra alatyn edi. Qazir buǵan qajettilik týyp otyr. Sondyqtan, portfeldik kompanıa ókilderi, bıznes salasynyń ókilderin, qor naryǵy salasynan bırjalyq kompanıalardy tartyp, birge talqylaýdy jón kórdik. Iaǵnı, kelesi jyly tikeleı ınvestısıa qorlary qor naryǵy arqyly kire alatyn arnaıy ınfraqurylym qurý múmkindigin izdeıtin bolamyz», - dedi A.Dostıarov.
Óz kezeginde KASE ókilderi bul múmkindikti qarastyrýǵa óz pikirlerin bildirdi.
«Bizdiń qorda 4 alań bar. Biz qundy qaǵazdarmen, derıvatıvtermen jumys jasaımyz. Sondaı-aq, valúta naryǵy bar. Alaıda, tartymdy emıtent tabý úshin ony ósirý kerek. Sondyqtan, biz startaptan bastap IPO deıin damytý strategıasyn qolǵa alǵanbyz. Emıtent naryqqa shyǵyp, óziniń ınvestor izdeıtinin jarıalaǵan soń korporatıvtik basqarý boıynsha barlyq talapty oryndaýy tıis. Sondyqtan, Qazaqstanda venchýrlik kapıtal úlken ról oınaıdy. Óıtkeni, kompanıalarǵa bıznes bastaǵanda qarjy kerek. Biz óz tarapymyzdan startap alańyn qurýdy qolǵa aldyq. Bul ınvestorlardy tabýda basty qadam bolady. Óıtkeni KKM-de qor naryǵyna shyǵýǵa daıyn kompanıalar bar. Bırja ınfraqurylymy buǵan tolyǵymen múmkindik beredi», - dedi KASE basqarma tóraıymy Aldambergenova Alına
