«Qamshy» portaly biraz ýaqyt buryn «Máńgilik saǵynysh» atty maqala jarıalap, shettegi qandastardyń Qazaq eline degen kúımen joldaǵan sálem saǵynyshyn jetkizgen edi. Pátiqan Aıjaqsy aqsaqaldyń bul kúıi biraz oqyrmannyń kóńilin tolqytyp, júrek túkpirinen oryn tapqan. Endi mine Pátiqan aqsaqaldyń ónerpaz uly Qamıtqanmende áńgimelesýdiń sáti tústi.
- Ózińdi qysqasha tanystyra ketseń...
- Men Úrimji qalasyndaǵy Táńirtaý mal fermasy degen úlken aýylda týyp-óstim. Kishkentaıymnan ónerge qyzyqqanyma eń basty sebepker bolǵan meniń ákem, ol maǵan alty jasymnan bastap qazaqtyń úkili dombyrasyn ustatty. Kúı tartýǵa, án salýǵa baýlydy. Mektep oqýshysy bolǵan kezde mektep ishinde ótetin qandaı da bir is-qımyldan qalǵan emespiz. Sol kezde aýyldaǵy úlken kisilerdiń, ustazdardyń aq batasyn alyp júrdik. 2002 jyldan bastap úlken sahnalarǵa aqyryndap aıaq basyp, kólemdi konsertterge qatysa bastadym. 2006 jyly «Jańa áýen» ujymynyń óner mektebiniń shákirti boldym. Ahmetjan Rabjanuly sıaqty aǵalarmen birge án sabaǵynan dáris aldyq. Sol jyly Erbosyn Nurmuqanuly aǵanyń qoldaýymen Naýryz merekesinde alǵash ret ólkelik úlken sahnada án aıttym.
- Ózińniń aıtyp júrgen ánderińniń arasynda «Bóten qyz» degen án halyqqa jaqsy tanys, osy ánge toqtala ketseń?
- Men sol jyldan bastap jeke shyǵarmashylyq baǵytta jumys isteı bastadym, jeke ánderimdi jazyrdym. Ol jaqta ózińiz biletindeı esh ponogrammasyz án aıtylady. Sondyqtan da kóp eńbek etýińiz kerek. Dosym Janat Nursultanulynyń áni «Bóten qyz» 2007 jyly oryndaldy. Bul ándi Shymkent qalasynan Jambyl deıtin azamat Úrimjige arnaıy kelip attaı qalap alyp ketti.
- Seniń kompozıtorlyq qyryń bar dep estidik, án jazyp júrsiń be? Búginde nemen aınalysyp júrsiń?
- Alǵashqy týyndymdy byltyr ǵana jazdym, Jaras Dálelqan aǵamyzdyń sózine jazylǵan «Jamalym- aı» áni. Telearnada dýblıaj jasap qosymsha jumys istep júrgen jaıym bar. Sońǵy úsh- tórt jylda asabalyq ónerdi de júrgizip kelem. Asabalyq óte bir qıyn, jaýapkershiligi mol jumys, azdap qyzyǵýshylyǵym da bar bul kásipke, sondyqtan da sońǵy jyldarda Úrimjide toılarǵa shyǵyp júrmin.
- Ákeń Pátiqan Aıjaqsyuly Tańjaryq Joldyulynyń búkil óleńderin jatqa biletinin bilemiz. Seniń Asabalyq óneriń osymen baılanysty da shyǵar, úıińde basqa ónerli adamdar bar ma? Asabalyq ónerge kimderdi úlgi ettiń?
- Bizdiń otbasy negizinen ónerli otbasy desem de bolady. Úıdegi ápkelerim bolsyn, baýyrlarym bolsyn qolynan dombyrasyn tastamaıdy. Toı táńirdiń qazynasy deıdi. Toı degenimiz alysty jaqyndatyn, jaqsylyqtyń jarshysy. Asabalyq ónerge meni naǵashy aǵam, sheshemniń baýyry Mákibaı Nuqnabıuly baýlydy.
- Ol jaqtaǵy qazaqtardyń Qazaqstanǵa degen, Atajurtqa degen ańsary men mahabbaty qalaı?
- Árbir shette júrgen qazaqtardyń Qazaqstan dese eleńdemeıtini joq dep bilemin. Dostarymyz bolsyn, biz biletin jastardyń qaı- qaısysy bolsa da elge barsaq, jurtty kórsek dep jatady.
- Óziń Qazaqstanǵa qashan qonys aýdarasyń?
- Men shette júrsem de árqandaı ýaqytta qazaq elinde beıbitshilik bolsa eken, Qazaq eli damı berse, gúldenge bersin dep ishten tilep júretin qazaqtardyń birimin. Sońǵy jyldarda jıi kelip júrmin, Alla amandyq berse jaqynda birjola kóship kelemin.
- Tyńdarmandaryńa, elińe qandaı tilek aıtasyń?
- Aldymen ónerdi ardaqtaı biletin, salmaqtaı biletin el jurt aman bolsyn, ónerge qoldaý bildirip júrgen aǵalardyń isi órge bassyn. Elimiz aman bolsyn, jurtymyz tynysh bolsyn! Osyndaı suhbat uıymdastyryp otyrǵan «Qamshy» portalyna da óz atymnan aıryqsha alǵys bildiremin.
Suhbattasqan Erlan Tóleýbaı
