Oqymaǵannyń kesiri-aý. Zaman kóshinen ylǵı qalam da júrem. Kez kelgen jańalyq, kez kelgen ósek meni aınalyp ótip ketedi. Keıde bir uıqy keshigip jatqanda áıelimnen áldene estip qalam. Onyń ózin qazbalap surap alýǵa mı qurǵyr asa jete bermeıdi.

Erte jaryqta aýylǵa baryp, soǵym soıyp keleıik dep, jan-jarymdy, eki ul, bir qyzymdy alyp jolǵa shyqtym. Qaladan uzap shyqpaı-aq MAI qyzmetkeri toqtatty. Neden sasam? Qujat tastaı. - Júrgizýshi kýáligińiz! - Mine! - Tehpasport! - Mine! - Saqtandyrý... - Mine! Sózin aıaqtatpaı taq, taq etip turmyn. Taǵy da suraı tússe eken dep. - Kólikte kimder bar? Bolmaıtyn jerde jyn qysatyny bar. Sol qurǵyr paıda bola ketip: - Kóńildesim bar. Demalyp qaıtaıyq dep sol... - Ras pa? - Ras! - Onda sizge aıyppul jazamyz. Beri júrińiz. - E, ne úshin? Jol erejesin buzdym ba? Bireýdi qaǵyp kettim be? - Siz ne? Jańa zańdy bilmeısiz be? Zań boıynsha, kóńildesimen qolǵa túsken kólik júrgizýshi on bir myń eki júz qyryq bir teńge toǵyz tıyn tóleıdi. - Al, óz áıelimen kele jatsa she? - Onda tólemeıdi. - Bastyq myrza, men óz áıelimmen kele jatyrmyn. - Ótirik aıtpańyz, siz kóńildesińizben kele jatsyz. - Sizge jáı qaljyńdaǵam. Ras, óz áıelimmen kele jatyrmyn. - Qaljyńdasatyndaı men sizdiń qurasyńyzbyn ba, jezdeńizbin be? - Joq, endi... Kólikte kim bar degen soń... netip... ázildep... - Memlekettik qyzmetkerdi ájýalaǵanyńyz úshin jaýap beresiz. Júrińiz beri. Qujat toltyramyz. - Aýylǵa asyǵyp bara jatyr edik. İshte kishkentaı bala bar degendeı. Tońyp qalatyn boldy. Bir jolǵa jibere salyńyzshy. - A, kóligińizde jas bala da bar ma? - Iá, ıá, bir emes úsh bala bar. Jol uzaq. Júre bereıinshi. - Balalaryńyz neshede? - Úlkeni altyda, ortanshysy tórtte, kishisi ekige endi keldi, baseke... - Olar qaıda otyr? - Kólikte ǵoı, baseke. Kólikte otyr... - Kólikte otyrǵanyn ózim de bilem. Avtokresloda ma deımin? - Qan-daı kreslo? - Avtokreslo! Avto! - Iá, avtoda otyr ǵoı. Avtoda... kólikte... - Týý, ne degen uqpaıtyn adamsyz! Júrińiz kóreıik. - Kimdi? - Avtokreslońyzdy! - Osynnan-aq kórinip tur emes pe? Áne, ana jaman sary mashına meniki... - Kreslony kórem deımin sizge. Kreslony! - A, bizde qaı bir kreslo deısiz? Astyńa birdeńe tósemeseń batyp ketetin, súıenseń shalqaıyp kete beretin eki oryndyq aldynda... - Siz ne aıtyp kele jatsyz? Esigińizdi ashyńyz! - Mine, bizdiń kólik osy! - Úsh balańyzda da avtokreslo joq! - Oıbaı-aý, baseke-aý, qarshadaı úsh balada avtokreslo qaıdan bolsyn? Meniń ózim tyrbanyp júrip, osy avtony zorǵa aldym nesıege... - Siz meni taǵy da mazaq qylyp tursyz ba? - Joǵa. Baǵana bir baıqap kórip em, bolmady. Endi oǵan shama qaıda? - Qysqasy, úsh balada da avtokreslo joq. Árqaısysyna jeke aıyppul tóleısiz. Aıtpaqshy, kóńildesińizge jeke qujat toltyramyz. Osy kezde sózge balalardyń anasy aralasty. - Kóńildesi nesi? Qaıdaǵy kóńildes? - Qazir, qazir, janym, sosyn túsindirem... - Sosyn emes, qazir túsindir! - Sosyn, sosyn deımin. Qazir myna páleden qutylyp alaıyqshy. - Siz ne dedińiz? - A, joq, sizge emes. Qazir myna másele sheshilsin degenim ǵoı... - Ol máselede meniń sharýam joq. Qane, jaýap ber. Qaıdaǵy kóńildes? Myna kisi ne aıtyp tur? - Toqtańyzdar! Jeke sharýalaryńyzdy sosyn sheshesizder. Siz beri júrińiz! - Toqtamaımyn. Nege toqtaıdy ekem? Mynanyń kóńildesi kim? Siz ony qaıdan bilesiz? - Men eshteńe bilmeımin, azamatsha. Aı, azamatsha deppin ǵoı, ne edi?.. - Qalaısha eshteńe bilmeısiz? Siz jańa ǵana kóńildesińizge jeke qujat toltyramyz dedińiz ǵoı. Menen ne jasyryp tursyzdar? - Týý, ne degen adamsyz? Boldy ǵoı endi. Men sizdi myna kisiniń kóńildesi eken dep qaldym... - Qalaı kóńildesi eken dep qalasyz? Ne, bul ylǵı kóńildesimen júrýshi me edi? Kóńildesten sadaǵa ketkir, kóńildeste basyń qalǵyr, odan da bala-shaǵańdy baǵyp almaısyń ba? Qysqasy, MAI qyzmetkeriniń de basy bálege qalyp, eki jaqtap júrip áıelime bárin túsindirdik. Álde, ol túsingendeı boldy. Biraq, «attyń syry ıesine málim» demekshi, kózinde bir kúmán qaldy. Aldaǵy aıqastardyń birinde ol osy qarýdy mindetti túrde qoldanatyn bolady. Sonymen qoıshy, qatyn sabyrǵa kelgennen keıin jańa saýda qyzdy. - Úsh balada úsh kreslo joq. Bul degenińiz toǵyz myń bir júz elý alty teńge jeti tıynnan eseptegende... úshke kóbeıtkende... - Oıbaı, eń bolmasa bireý dep kórsetshi. Toǵyz myńnyń ózi az aqsha emes qoı, baseke... - Úshti qalaı bir dep kórsetem. Siz maǵan zańdy buz dep tursyz ba? - Eń bolmasa ekeý deshi onda. Bireýi anasynyń aldynda otyr ǵoı. Iá, tiri kreslonyń ózi otyr ǵoı balasyn qushaqtap... - Jaraıdy, ekeý deıin. Tek, kelesi joly avtokreslosyz balalardy alyp júrmeńiz. Zań qatal. - A, zań demekshi. Taǵy qandaı zańdar bar? Bile júreıik, shekege tıdi ǵoı. - Eger kólikte kóńildesińizben kele jatsańyz... - Joq, ol qursyn, ony bildik qoı. - A, ıá. Eger kólikte eki erkek qana kele jatsa, olardyń kógildir emes ekenin rastaıtyn kýálik kerek. Al, eger kógildir bolǵan jaǵdaıda basqalardyń kózine shóp salyp júrgen joq pa? Óz juby ma? Sony rastaıtyn kýálik kerek. Eki áıel ǵana kele jatsa da solaı. Sosyn, erkek pen kishkentaı bala nemese qyz ǵana kele jatsa, júrgizýshiniń pedofıl emes ekenin rastaıtyn kýálik qajet. - Ne bop ketti ózi? Máselen, men aýylǵa soǵym alyp qaıtýǵa bara jatyrmyn. Oǵan baıaǵy «Urlyq mal emes» degen anyqtama jaraı bere me? - Joq. Ol da ózgergen. Qazir qoı soıasyz ba, ógiz soıasyz ba? Sol maldyń óziniń jazbasha kelisimi kerek. Ol qaǵaz bolmasa jolǵa shyqpaı-aq qoıyńyz. Sizdi dereý ýaqytsha qamaý ızolátoryna jiberedi. - ???

(Qanaǵat Ábilqaıyrdyń feısbýktegi paraqshasynan)