Jambasy oıylǵansha besikte jatqan balanyń ákesi sot aldynda jaýap berýde. Mańǵystaý oblysynda 40 gradýs ystyqta, kúnniń astynda tirideı shyjǵyrylyp jatqan Beknurdy Basqudyq aýylynyń turǵyndary kezdeısoq kórip qalǵan.

Skrınshot KTK arnasynan

Sóıtip tıisti organdarǵa habar bergen edi. Sol balanyń ákesine endi ata-analyq mindetin durys atqarmady degen aıyp taǵylyp otyr. Qarshadaı uldy qaldyryp, tórkinine ketken anasynyń da quqy shektelgenin aıta keteıik.

Bir jarym jastaǵy balany besikke tańyp tastap, qaraýsyz qaldyrǵan osy adamdar. Ata-ájesi, aǵa-apasy, ógeı sheshesi de osynda. Bastapqyda Beknurdy ólimshi halge túsirgen ájesi de qylmystyq jaýapqa tartylady delingen. Keıin aıyptalýshy oryndyǵynda ákesi ǵana qaldy. 31 jastaǵy jigitke ata-analyq mindetin durys atqarmady degen aıyp taǵylyp otyr. Beknurdyń aýyr halin aýyldastary kezdeısoq kórgen. Sóıtip tıisti organǵa habarlapty. Al, dárigerler balanyń aýrýhanaǵa óte aýyr halde túskenin aıtady. Jata-jata jambasy oıylyp, irińdep ketken. Aýyz, muryn qýysy qaýipti ınfeksıaǵa toly, kir-qojalaq kúıde alyp kelgen. Beknur sol kezde bir jarym jasta bolsa da qımyldaı almady. Bala ylǵı ash jatqandyqtan qany da azaıyp ketken.

Ótken kúnniń elesi jadynda saqtalyp qaldy ma eken, Beknur búginde tamaqty toıyp jeýge tyrysady. Aýrýhanada bir aı emdegen soń balalar úıine aýysqan. Bala búginde ál jınap, tisi shyǵa bastapty.

"Qazir bala otyryp, jaılap turyp, jar jaǵalap júrip, endi ózi júrip ketýge  jaqyn júr. Tamaqty jaqsy jeıdi. Uıqysy tynysh. Anasy árdaıym kelip turady. Jaqsy qaraıdy. Balasy kútip otyrady. Mamasyn tanıdy...", - deıdi Mańǵystaý oblystyq balalar úıiniń dırektory Svetlana Jubanturlıeva,

Anasynyń Beknurdy izdep júrgeni qazir ǵana. Jadyra Myrzaeva enesi kún kórsetpegen soń balany tastap Shymkentke tórkinine ketip qalǵan. Polıseıler ony eki aı izdep, tapqan soń sot analyq quqyn jarty jylǵa shektegen bolatyn. Osy ýaqyt aralyǵynda meıirim, qamqorlyǵyn kórsetse, bala anasyna berilmek. Beknurdyń ákesine taǵylǵan aıyp óte sırek qoldanylady. Endi 31 jastaǵy Almas Sadyqovtyń aıyby sotta dáleldense, oǵan aıyppul salynady nemese 2 jylǵa deıin bas bostandyǵynan aıyrylady.

Alaıda, onyń jazasyn jeńildetetin jáıtter de bar: onyń úshinshi áıeli tórtinshi balasyn bosanǵaly otyr.

"KTK"