Tuńǵysh ret qazaq akterleriniń ishinen M.Áýezov atyndaǵy akademıalyq drama teatrynyń akteri, QR eńbek sińirgen ártisi, «Qurmet» ordeniniń ıegeri Aıdos Bektemir gollıvýdttyq kınoǵa tústi. Teatr akteri «Marko Polo» fılminde negizgi rólderdiń birin somdady. Fılm ataqty saıahatshy-jıhankez Marko Polo jaıynda. Akter Shyńǵysqannyń senimdi serigi, general Arýkanyń rólinde oınady. Fılm Malaızıada túsirilgen.
Osyǵan deıin Aıdos Bektemir «Jaýjúrek myń bala», «Aǵaıyndylar» fılmderinde de birneshe róldi somdaǵan. Kezekti fılmge akter oılamaǵan jerden túsken. Bul jóninde Aıdos Bektemir suhbatynda «Kóktemde artıser arasynda «Gollıvýdtan arnaıy top kelip, kastıng ótkizedi eken» degen áńgime júrdi. Kınoǵa óz basym kóp túspegendikten, asa mán de bermedim. Bir kúni oıda joqta Natasha esimdi qyz habarlasyp: «Marko Polo» serıalyna artıs tańdap jatyrmyz. Sizdiń teatryńyz-dan da akterler qatysýda. Erteń kelińiz» dedi. Ertesine barǵanymda, sheteldik re-jısser men fotograf qabyldap, sýretke túsirip aldy. Fotosynamadan keıin rejıser maǵan judyryǵyn kórsetti. Onysyn qalaı túsinerimdi bilmeı, tosylyp qalsam kerek, meni shaqyrǵan Natasha: «Rejıser sizdi unatyp jatyr» dedi kúlip. Odan keıin de shaqyrdy. İrikteý ótetin bólmesinde rejıseri, sýretshisi, operatory, taǵy da basqalary bar, uzyn sany jıyrma shaqty adam otyr eken. Mundaı kastıngti birinshi kórýim, qatty tańǵaldym. «Qazaqfılmde» eki-úsh adamnyń ǵana qabyldaýynan ótseń, bular tutas shyǵarmashylyq toppen birge otyryp, akter irikteıdi eken. Esikten ene bergenim sol edi, bári oryndarynan atyp turyp, óz tilderinde amandasty, sasqanymnan «Ýaǵaleıkýmassalam! Raqmet, raqmet…» dep jatyrmyn. Shyńǵys hannyń senimdi serigi, general Arýkanyń obrazyna ený kerektigin túsindirip, qolyma mátin berdi. Ózimdi attyń ústinde otyrǵandaı sezinip, aǵylshynsha mátindi oqyp berdim. Bári rıza bolyp, qol shapalaqtap shyǵaryp saldy. Kóp uzamaı, Gollıvýd kınosyna túsýge múmkindik alǵanymdy aıtty. Sener-senbesimdi bilmeı, abdyrap qaldym. Alǵashynda, túsirilim kúzde bastalatynyn eskertken. Alaıda, ýaqyty ózgerip, jazda Malaızıaǵa ushyp kettik. Tájikstan, Qyrǵyzstan, Ózbekstannyń akterleri ótpeı qalǵan Arýkanyń róline, Alla buıyrtyp, qazaq elinen men ótip kettim»,-dep aıtyp ketti.
"Baistars.kz"
