Batys Qazaqstan oblysy Aqjaıyq aýdanynda oblys jastarynyń Elbasynyń «Bolashaqqa baǵdar: rýhanı jaǵyrý» maqalasynan týyndaǵan baǵdarlamardy júzege asyrý, bul salmaqty qyzmette jastardyń úlesterin arttyrý maqsatynda «Jastar qýaty – bolashaqtyń qýaty» forýmy ozdyryldy. Oblystyń jastar kóshbasshylary, aýdannyń belsendi jastary, Jaıyq óńirinen túlegen jerles jastardyń qatysýymen ótken forým aıasynda «Bilim básekelestigi, tárbıe sabaqtastyǵy», «Rýhanı qazyna – ultymyzdyń murasy», «Aqparat tolqyny – jastar úlesi», «Jastardyń boıynda ulttyq kodty qalyptastyrý, patrıotızmge baýlý» taqyryptary boıynsha 4 seksıalyq otyrys ótkizildi. Barlyǵy atalmysh sharaǵa 200-ge tarta qyz-jigit qatysyp, ózderiniń ustanymdarynyń, óńirimizdiń tirligin jaqsartýǵa degen tilekteriniń zor ekendikterin taǵy bir dáleldedi. Olar ózderiniń kókeılerindegi ózekti suraqtaryna tıisti jaýaptar alyp, osy taqyryptar boıynsha birqatar mańyzdy usynystaryn ortaǵa saldy.
Forým jumysyna arnaıy oblys ortalyǵynan bilikti mamandar shaqyrtylyp, jastardyń osy salada tolyqqandy aqparatpen qamtylýy qarastyryldy.
Atalmysh sharaǵa qatysýshylar aqıyq aqyn, jyr jebesi – Juban aqynnyń eskertkishine gúl shoǵyn qoıyp, artynsha «Órken» kovorkıng ortalyǵynyń ashylý rásimine qatysty. Saltanatty sátte sóz alǵan oblys ákiminiń orynbasary Ǵ.Ospanqulov osyndaı nysandardyń jastardyń áleýetin kóterýdegi róli men úlesi zor ekenine erekshe nazar aýdardy. Rasynda da, birlesip jumys isteıtin ortalyqtardyń qyz-jigitterge usynar qyzmetteri mol. Aıtalyq, ınternetti paıdalaný, uıymdastyrý tehnıkalaryn, ıaǵnı kompúter, ózge de jabdyqtardy qoldaný múmkindikteri munda jastarǵa tegin usynylady. Ortalyq shartty túrde 4 aımaqqa bólingen: ortalyq alań, jeke jumys alańy, erkin demalys alańy jáne rýhanı jańǵyrý zaly. Mundaǵy basty maqsat – jastardyń shyǵarmashylyq, ıntellektýaldyq áleýetin arttyrý jáne kásipkerlik aınalysýǵa nıetti, biraq ázirge keńselik orynǵa muqtaj jastarǵa ózderiniń bıznesterin óristetýge múmkindik berý.
Forým aıasynda Aqjaıyq aýdany ákimdigi men oblystyń beldi 5 joǵary oqý oryndarynyń arasynda ózara yntymaqtastyq jóninde memorandýmǵa qol qoıyldy. Plenarlyq májiliste sóz alǵan oblys ákiminiń orynbasary Ǵabıdolla Abdollauly forým jumysyna oń baǵasyn berip, oblys aýdandarynyń ishinde alǵash ashylǵan kovorkıng ortalyǵynyń jumysyna sáttilik tiledi.
Shara aýdan jastarynyń dástúrli Hİİ «Jastyq jiger» festıvaline ulasty. Munda aýdan ákimi Ádil Jolamanov aýdanda jyl belesinde jastar saıasaty salasynda atqarylǵan jumystar týraly aqparatpen bólisti. Aýdan boıynsha osy salada «Aqjaıyq órenderi» jastar qoǵamdyq birlestigi jáne jastarmen jumys jónindegi resýrstyq ortalyq jumys isteıdi. 18 aýyldyq okrýgte jastar isi jóninde keńesshi jastarmen tyǵyz qyzmet atqarýda. Jańa jyldan bastap 5 iri eldimekende osyndaı mamandar ashý qarastyrylǵan. Jastardyń bastamasymen aýdan ortalyǵynda ashylǵan «Shapaǵat» qaıyrymdylyq dúkeni arqyly az qamtylǵan 130 otbasy kıim-keshektermen kómek alsa, búginde osyndaı nysan barlyq aýyldyq okrýgte ashylýda. Qazirgi tańda Esensaı, Kónekketken, Qaraýyltóbe, Bazarsholan aýyldarynda «Shapaǵattyń» shapaǵatyn 54 januıa kórdi.
Osydan soń aýdan basshysy jyl mejesinde úzdikter qatarynan kóringen jastarǵa arnaıy syılyqtaryn tabys etti. Sonymen qatar jigitke tán márt minez, qaıyrymdylyq pen meıirimniń alǵaýsyz úlgisin kórsetip, beıtanys qyzǵa óz búıregin syılaǵan Abzal Ádilovke de erekshe ystyq iltıpat kórsetildi. «Zaman» Batys Qazaqstan oblysynyń óndirýshiler asosıasıasynyń tóraıymy Aıgúl Týrkına jáne Almaly aýylynyń turǵyndary atynan Bolat Óteshev barsha jerlesterdiń atynan yqylaspen rızashylyǵyn bildirdi.
Shara sońy aýdannyń ónerpaz jastarynyń án-bıimen órilgen konsertke ulasty.
