QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva ákimderge bir-bir tikushaqtan berýdi usyndy, dep habarlaıdy Qamshy.kz aqparat agenttigi «QazAqparat» HAA málimetine súıenip.
«Qazaqstandyqtar áli osyndaı tikushaqtardyń paıdasyn bilmeıtin de shyǵar. Menińshe, sanıtarlyq jáne medısınalyq avıasıa damýy kerek. Árbir ákimde, ásirese, aýyl sharýashylyǵy mańyzdy aımaqtardyń ákimderinde bir-bir tikushaqtan bolýy tıis. 500 shaqyrymdyq qashyqtyqty kólikpen bir kúnde júrmeı, tikushaqpen 2-3 saǵatta ushyp jetýge bolady», - deıdi Astanadaǵy tikushaqtardy qurastyrý jáne qyzmet kórsetý zaýytyna barǵan Darıǵa Nazarbaeva.
Darıǵa Nazarbaevanyń aıtýyna qaraǵanda, bul qadam sheneýnikterdiń jumysyn jeńildete túser edi.
«Sonymen birge, úlken qalalarda adamdar kóbinese tańerteń nemese keshke jaqyn kepteliste turyp qalady. Sondaı úlken qalalarda mundaı tikushaqtar bıznes úshin jáne taksı retinde paıdaly bolar edi. Menińshe, bizdiń ekonomıkamyzdyń bolashaǵy buǵan múmkindik berer dep oılaımyn. Osyndaı ónerkásipti árıne, barlyq jaǵynan qoldaýymyz kerek. Osyǵan birtalaı qarajat saldyq. Ary qaraı damıtyn jolyn Úkimet arqyly, bálkim baǵdarlamalar arqyly qoldaý kerek», - deıdi Darıǵa Nazarbaeva «Evrokopter Qazaqstan ınjınırıń» JSHS týraly.
Eske sala ketsek, búgin QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva bastaǵan komıtet músheleri Astanadaǵy Ulttyq ǵarysh ortalyǵy men «Evrokopter Qazaqstan ınjınırıń» JSHS-da bolyp, atqarylyp jatqan jumystarmen tanysqan bolatyn.
