Almatydaǵy Respýblıka saraıy «Almaty áýenderi» MKQK qaramaǵyna berildi, dep habarlaıy Qamshy.kz aqparat agenttigi QazAqparat málimetine súıenip.
Osy ýaqytqa deıin konsert alańy qalalyq Mádenıet jáne muraǵat baqarmasyna qarap kelgen bolatyn. 28 jeltoqsannan bastap menshik ıesi ózgerdi.
«Respýblıka saraıy» JSHS taratyldy. Al qyzmetkerleri «Almaty Áýenderi» MKQK jumysqa turady.
«Menshik túri JSHS bolǵannan góri memlekettik komýnaldyq kásiporyn bolǵan tıimdi. Endi qyzmetkerler jappaı aqysy tólenbeıtin demalysqa ketpeıdi. Turaqty jumys bolady. 2017 jyly ujym 86 shara uıymdastyrǵan. Bul sharalardyń barlyǵy óte joǵary dárejede ótti. Sizderge rızamyn», - dedi taratylǵan «Respýblıka saraıy» JSHS dırektory Arman Asenov.
Jıynda qalalyq Mádenıet basqarmasy basshysynyń orynbasary Danıar Álıev ujymǵa jańa basshyny tanystyrdy. «Respýblıka saraıy «Almaty áýenderi» mekemesiniń menshigine ótedi. Endi kásiporyn basshysy Baǵdat Tilegenov Respýblıka saraıynyń jumysyn basqaratyn boldy»,- dedi Álıev.
Baǵdat Tilegenovtyń aıtýynsha, qazir Respýblıka saraıynda 77 adam jumys istep keledi.
«2018 jyldyń qańtarynan meniń atyma jumysqa turý týraly aryz jazyńyzdar. Orynbasarlar qysqaratyn boldy. Tek úsh orynbasar qalady. Ol orynǵa kimder qabyldanatyny belgisiz. «Almaty Áýenderi» shyǵarmashylyq ujymy burynǵy rejımde jumys jasaıdy»,- dedi «Almaty Áýenderi» MKK dırektory Baǵdat Tilegenov.
«Almaty Áýenderi» MKQK qalanyń mádenıet jáne shyǵarmashylyq salasynda óndiristik shyǵarmashylyq qyzmetin júrgizýmen, mádenıet jáne óner adamdaryna qoldaý kórsetýmen aınalysady.
Aıta keteıik, Respýblıka Saraıy - Almaty qalasynda ornalasqan mádenı ortalyq ǵımarat. 2008 jyly 21 naýryzda «Respýblıkalyq mańyzy bar tarıh, mádenıet, qala qurylysy jáne arhıterktýralyq eskertkishi» mártebesi berilgen. Ǵımarat 1970 jyly V.Lenınniń 100 jyldyǵy qarsańynda ashylyp, Keńestik kompartıa kóseminiń esimi berildi. Munda 1991 jyly 10 jeltoqsanda Qazaqstan Respýblıkasynyń Tuńǵysh saılanǵan Prezıdenti N.Á.Nazarbaevtyń qyzmetine kirisýine baılanysty ulyqtaý rásimi ótti. Osy jyly ǵımarattyń ataýy «Respýblıka Saraıy» dep ózgertildi.
