Astana tórinde «Han Shatyr» OSO-da Qazaqstan Respýblıkasynyń Táýelsizdik kúnine oraı «Batyrs’ Battle» mádenı-sporttyq jobasynyń tuńǵysh týrnıri tusaýyn kesti dep habarlaıdy Qamshy.kz aqparat agenttigi. Qazaqtan shyqqan alyp kúsh ıeleri Qajymuqan, Balýan Sholaq atalarymyzdyń jolyn qýǵan segiz balýan kúsh atletıkasy boıynsha básekege túsip, baq synasty.
Atalǵan dodaǵa elimizdiń túkpir-túkpirinen kelgen segiz balýan Bahadúr, Erkin, Kókjal, Maska, Suńqar, Taý Tulǵa, Tolaǵaı jáne Shymyr degen laqap attarmen óner kórsetti. Jarysqa qatysýshylardyń eń jasy kishi 18 jastaǵy pavlodarlyq Suńqar balýan bolsa, eń jasy úlken 42 jastaǵy qaraǵandylyq Erkin batyr boldy.
Saıys tórt kezeńdi qamtydy. Atap aıtsaq:
1-kezeń: salmaqtary 60, 80 jáne 100 keli tartatyn qaptardy jyldamdyqqa kóterý;
2-kezeń:160 keli tasty jyldamdyqqa kóterý;
3-kezeń:140 keli bórenemen otyryp turý;
4-kezeń: som temirdi ıý.
Jarys erejesi boıynsha ár kezeńde tómen nátıje kórsetken 2 qatysýshy týrnırden shettetilip otyrdy.
«Balýandardyń barlyǵy da zor alyp kúsh ıeleri. Qajymuqan atamyzdyń naǵyz izbasarlary desek artyq bolmaıdy. Myqtylardyń myqtysyn anyqtaý ońaı bolmady. Ásirese, qatysýshylardyń kúsh-jigerlerimen qatar jyldamdyqtary da baǵalanǵan 1, 2-kezeńde nátıjelerdiń aıyrmashylyǵy sekýndtyń ondyq jáne júzdik bólikterin qurady. Degenmen, betperde kıgen shymkenttik balýan ózgelerden basym túsip, jeńiske jetti», - deıdi jobanyń atqarýshy dırektory Almas Qojahmetov.
Jarys qorytyndysy boıynsha týrnır jeńimpazyna 200 myń teńge somasynda aqshalaı júlde tabystalyp, «Batyrs’ Battle» arnaıy kýbogi tartý etildi. Al ózge balýandar Astana qalasy ákimdiginiń atynan taǵaıyndalǵan estelik medaldarmen jáne dıplomdarmen marapattaldy.
Sondaı-aq, kezeńder arasyndaǵy úziliste jas sportshy, KInES Qazaqstan rekordtar kitabynyń rekordsmeni Amır Mahmet shyny bótelekelerde keýdesin jerden kóterip, jınalǵan qaýymdy óz ónerimen tánti etse, «Batyrs’ Battle» jobasynyń avtory, bas úılestirýshi Sergeı Syrýlnıkov Qajymuqan atamyzdyń birqatar kúsh kórsetilimderin qaıtalap, shara kórkin qyzdyra tústi. Sonymen qatar, salmaǵy 160 kelini quraıtyn tasty tisimen kóterý arqyly jańa rekord ornatyp, kórermenderdi tań qaldardy.
«Batyrs’ Battle», ıaǵnı «Batyrlar shaıqasy» elimizde ulttyq naqyshtaǵy shoý elementterden turatyn kúsh atletıkasy boıynsha saıystardy uıymdastyrýǵa baǵyttalǵan tuńǵysh teńdessiz joba. Jobanyń basty mısıasy salaýatty ómir saltyn nasıhattap, er kúshin syndarly dáripteýdi qalyptastyrý jáne qoldaý. Myńdaǵan jyldar boıy tarıh enshisinde qalyp kelgen Uly dala batyrlary men balýandarynyń kúsh saıystaryn qaıta jańǵyrtyp, dara serilik kodeksin tanymal etý. Osylaısha, «Máńgilik el» jáne «Rýhanı jańǵyrý» jalpyulttyq baǵdarlamalaryn iske asyrýǵa úles qosý bolyp tabylady.
«Batyrs’ Battle» ulttyq qundylyqtarymyzdy dáripteýge baǵyttalǵan joba. Bul jarysty uıymdastyrý arqyly endigi umytyla bastaǵan, jas urpaq tek tarıh betterinen ǵana oqyp bile alatyn ótken ǵasyrda qazaqtyń atyn álemge tanytqan Qajymuqan sıaqty atamyzdyń kúsh ónerin qaıta jańǵyrtýdy kózdedik. Búgingi doda bizdiń alǵashqy qarlyǵashymyz. Keleshekte atalǵan týrnırdi oblys jáne respýblıka kóleminde de ótkizýdi josparlap otyrmyz», - deıdi joba jetekshisi Anýar Mahmetov.
